Modi leh Carney inbiak tur a pawimawh – India

Modi leh Carney inbiak tur a pawimawh – India
Prime Minister Narendra Modi leh Canadian hruaitu, Mark Carney-a te G7 Summit neih paha an inbiakna tur chu tun hnaia ram hnih inkara khi zau tak awm siam thatna tur leh inpawh leh theihna tura remchang leh pawimawh tak a ni dawn tih Indian external affairs ministry chuan a sawi.
India-Canada inkar hi September, 2023-a Canadian prime minister hlui ni ta, Justin Trudeau-a’n an ram chhunga Khalistani inlak hran tum pawl hruaitu, Hardeep Singh Nijjar-a thahnaah Indian sorkar an inrawlh nia a puh atangin a chhe hle.
India chuan he puhna hi ‘awm ang lo lutuk’ tia chhangin Canadian sorkar chuan India-a inlak hran tum pawlte himna pea puhin Indian palaite tan pawha hlauhawm an nih theih phah niin a puh leh.
Zirtawpni kal ta khan Modi-a leh Carney-a hi a vawi khat nan phone-ah inbiain Indian prime minister hian June 15-17 chhunga Canada-a chawlh hmanna, Kananaskis-a G7 Summit awm tura a sawmna chu a pawm.
“G7 Summit neih ruala hruaitu pahnihte an inkawm tur hi ram pahnih inkar leh khawvel huap thil sawina remchang tak a ni dawn a, inkungkaihna tha siam leh tura ngaihven zawng inhrilhna leh thil pawimawh bik dang sawi dunna remchang a ni tel bawk ang,” tiin external affairs ministry thupuangtu, Randhir Jaiswal-a chuan Ningani tlaia thuthar lakhawmtute akawmnaah a sawi.
Kaiswal-a hian ram pahnihte indawrna tur thil engmah a sawi lo va, harsatna awmte erawh India chuan ‘vantlang hriatah chiang takin a puang tawh’ tih a sawi thung.
Canada-in Khalistani-te hmet mit turin chet a la tawk lo leh Indian hmun leh palaite tan pawha hlauhawm a nih chungchangah New chuan Trudeau-a sorkar khan heng mite hi hmun leh hun a pe lutuk niin a lo sawi tawh thin.
Carney-a’n kar hmasaa Modi-a a biak chu hruaitu pahnihte tan kum hnih chhung an inkar khi tawhah ‘India-Canada inkungkaihnain hma lam a pan leh theihna tur remchang’ a nih thu Jaiswal-a chuan a sawi.
Canadian Prime Minister’s Office-in phone-a Modi leh Carney inbiak chungchanga thu a chhuahah ‘dan kenkawhna kawnga inbiak leh venhimna thila inkawmna’ a nih thu an tar lang a. India thuchhuahah erawh hetiang hi a tel ve lo.
Canada-ah hian Nijjar-a thattua puh Indian mipa palite chungthu ngaihtuah mek a ni a. Hetiang karah hian lehlam lehlam hian ram danga dan pela khawsate chungchang pawh an ngai pawimawh a, heng zingah hian Khalistani inlak hran tum pawl pawh a tel.
Modi-a leh Carney inbiakna tur hi kum hnih dawn an inkar a khik hnua an inpawh leh theihna tura remchang hmasa ber a ni a. India leh Canada-a chengte inpawhna tha tak a awm karah Carney-a sorkar hian US-a Donald Trump-a sorkarin sumdawnna a kalpui dan avangin India hi eibar dapna kawngah pawh kawmngeih a duh.
Carney-a hian an rama Sikh-ten G7 Summit-a tel tura Modi-a a sawm an sawisel laiin a tang tlat a. India chu mamawh inpektawnna kawnga a pawimawh thu leh G7 member ram dangte rawn chunga sawm a ni tih a sawi.