Modi rilruah 2036 Olympic thlen a riak!

Red Fort, New Delhi-a 78th Independence Day lawmna vuakveta thu a sawiah Ningani khan Prime Minister Narendra Modi chuan khawvel huapa infiamna inkhawmpui lian ber ber thleng thei turin India chuan theihna a nei tih sawiin, kum 2036 Olympic Games thlen dil tumin ngaihtuahna an seng tan tawh tih a sawichhuak!
2036 Games thlengtu tur hi tun dinhmunah tihfel a la ni lo a, kum thar lamah hian International Olympic Committee (IOC) an han inthlang a, hruaitu tharte’n kum 2036 Olympic thlengtu tur chu an thlang tura ngaih a ni.
India bakah hian ram dang engemawzat pawhin he mi kum Games thlen hi an beisei dawn tih hriat a ni a, chu’ng zingah chuan Arab ram hausa pahnih Saudi Arabia leh Qatar bakah Turkey hming a ri ring ve bawk.
Modi chuan, “Kum 2036 Olympics thlen hi India mangphan a ni mek a, chu mi atan chuan kan inbuatsaih mek a ni,” a ti.
PM hian nikum September thla New Delhi-a khawvel ram 20 intelkhawmna G20 Summit hlawhtling taka an thleng thei khan Delhi leh khawpui lian dangte infrastructure lama an duai lohzia a pholang tih sawiin, “G20 Summit khan khawvela punkhawmna lian ber ber dawl zo turin theihna kan nei tih a lantir chiang hle a ni,” tiin Olympic Games thlen lam an hawi chhoh mek thu a sawi.
India beiseina tibeiseiawm turin tuna IOC head ni mek Thomas Bach hian Modi leh a sawrkar duhdan hi a thlawp tih a puang a, mahse, German pachal hian kum thara a term zawh hunah IOC hotu lawk ber a nih zui theihna turin dan dinglai tidanglam pawh ni se chuh zui a tum tawh loh thu a sawi a, mahse, IOC a hruai chhunzawm tawh lo a nih pawhin huhang lian tak la nei zui zel tura ngaih a ni.
India-in khawvel huap infiamna hmanga inelna lian (international multi-sport extravaganza) a dawl hnuhnunber chu Delhi-a kum 2010 Commonwealth Games a thlen kha a ni.
2036 Olympics hi Modi beisei angin India hian lo thleng thei dawn ta se Ahmedabad chu a hming tumtu (host city) ni tura rinkai ber a ni mek.
India zalenna champha lawmnaa Red Fort-a ram mipui hmaa thu a sawiah Modi chuan Paris Olympics zawh fel taka India infiammi chhuakte lawmpuina hlanin,
“Vawiin hian kan zingah Olympic-a sang taka India hnam puanzar khaikangtu thalaite an awm a, ram mipui vaibelchhe 140 zette aiawhin kan athlete leh player-te lawmpuina ka hlan e,” a ti.
Paris 2024-ah khan India chuan medal paruk a sualchhuak ve leih leih a, chu’ng zinga pakhat chu silver medal niin, a dang pangate chu bronze medal vek an ni a, athletics, shooting, hockey leh wrestling kaltlanga an dawn a ni.
Prime Minister thusawi lai khan a kiang hnaiah Indian top athlete rual an ding fur hlawm a, an zingah Paris-a bronze medal pahnih kapchhuaktu pistol shooter Manu Bhaker chu a langsar ber pawl a ni a; star goalkeeper PR Sreejesh hoin bronze medal an kawl lai humhimtu Indian hockey team member-te hmuh tur an awm bawk.
PM hian August ni 28 atanga September ni 8 chhunga Paris-a Paralympics hmachhawn tur Indian contingent hming lamchhuakin, “Ni reilote hnuah hian Indian contingent hrawl tak chuan Paralympics-a an theihna lantir turin Paris an pan ve leh dawn a, kan Paralympian zawng zawngte duhsakna ka hlan e,” tiin.
Kum thum liamta Tokyo Paralympics-ah khan India chuan medal 19 lai rutin, chu’ng zinga panga zet chu gold medal a ni a, silver pariat leh bronze paruk a tel bawk.
Tuntum hian Paris-ah Indian para-athlete 84 an inlan dawn a ni.