Modi sorkarin democracy rekbet : Sonia

Narendra Modi sorkar chuan democracy ‘rekbetin’ Prime Minister chuan Parliament ‘a hmusit’ tiin Congress Parliamentary Party (CPP) chairperson Sonia Gandhi chuan a sawi a.
Heng thute hi Parliament House pahnihna party member rualte nena Parliament building hluia Central Hall a inhmuhkhawmna an neiha a sawi a ni.
Tun ang renga ‘legitimate demand’ avanga parliamentarian hnawhchhuah tam hi a la thleng ngai lo va. Home Minister in Lok Sabha security breach chungchang chu a sawifiah ngei tur a ni a ti bawk a.
CPP chairperson chuan Parliament a thil thleng chungchangah Prime Minister in ni li hnuah chauh a sawi a, chu pawh parliament pawnah a sawi a la ni zui a ti bawk a.
“Modi hian House zahawmna a hmu tleu a, mipuite a ngai pawimawh hek lo bawk. Heng thil hi BJP te opposition laia thleng ni se an chetlak dan tur chu ngaihtuah chi pawh a ni lo” tiin Gandhi chuan a sawi bawk.
Parliament chuan Bill pawimawh Jammu & Kahmir chungchangte a pawm ti bawkin Gandhi chuan Congress dinna chu Statehood pek vat, inthlan huaihawt vat leh Ladakh mipuite duhdan tihhlawhtlin a ni a ti bawk.
Gandhi chuan sorkar lai mek chu ‘history her kawi danglam’ thinah puhin chung hmang te chuan ‘ram hmangaihtu Jawaharlal Nehru te ang chu tihhmingchhiat an tum a ni’ a ti bawk a.
“Heng thilah zawng zawng hian Prime Minister leh Home Minister chu a sulsutu an ni a, mahse, kan zam emaw dawih dawn hauh lo. thudik kan sawi zui char char ang” a ti bawk.
Congress chief hlui chuan Prime Minister-in economic growth a sawi leh a tak tak dinhmun a inang lo a ti bawk a. “Unemployment a nasa a, hausakna chu industrialist tlemte kutah a bawkkhawm a. Thil man a sang zual zel a, mirethei ten an tuar a ni,” a ti bawk.
“Tun ang hun harsaah hian kan ideology leh value te hi min kaihruaitu tur a ni a. Kan hruaitu hmasate khan harsatna tam tak karah hma an hruai lui tlat a, huaisen takin, nghet taka dingin zalenna min sual chhuahsak a ni,” tiin Congress Parliamentary Party chairperson chuan a sawi bawk.