Modric goal hmuh tur awm ve leh ta nawlh

Sikhat faia Bernabeu mikhual Sevilla an hnehna goal awmchhun khungin Real Madrid midfielder Modric chuan season kal laia a vawihnihna atan league goal a tilut a; a team chuan La Liga table-ah nghet zawka hma hruaiin, nizan result tarlan hman lohah an elpui lian pakhat zawk Girona-in Rayo Vallecano laka point an hmuh zawh loh phei chuan Carlo Ancelotti team hian an hnuaia awm pahnih tan pawhthlak an harsa zual sauhin a rinawm.
Pathianni zana Spanish giants chakna goal awmchhun khungtu Croatia midfielder Modric kha kum 38 mi lai a lo ni ve tawh a, Real rinrawl a ni pha ta chiah lo a, tun pawh kha substitute ni chunga lut niin, khelmual a rah tan atanga hun rei vak lo, minute 81-naah kual nalh zetin home team goal neihchhun a khung a; season kal lai La Liga game 21 a khelh tawhah tum 11 chiah luhhmasak a la chang.
Ballon d’Or winner pawh lo ni ve tawh Modric-a contract neih lai hi kumin June thlaa tawp tawh tur niin, Real boss Ancelotti chuan inkhelh banah khelhna hun a neih tlem avangin lo lunghnur deuh pawh ni se Croatian dinhmun a hriatthiampui thu a sawi a, a khelh chhunah erawh ka tan bench lama hnutchhiah reng harsa tak a la nihzia mi zawng zawng hmuhah a pholang thin.
“Hmaih reng rem lo a la nihna chu goal hmang kher lo pawhin a la lantir zel a, chu chu a training danah hian a ni a, squad pumpui tana example tling a nih tlat avangin bench lama hnutchhiah hi a khirh tat a ni,” a ti.
Ancelotti hian Modric-a contract chungchang tarlan telin, chu pawh chu thil chinfel leh sawifel duak harsa zet a nih thu heti hian a sawi:
“Engtia kalpui tur nge tih hi hriatthiam a harsa a, kei pawh player ka lo ni ve tawh a, professional player ni chunga ka kum hnuhnungber lo palliam ve tawh ka nihna zawnah a khelh tam tak loh vang hian lo hlim lo deuh pawh ni se ka hrethiam lutuk a; mi zawng zawngin a career tawp hnai ve tawhin ngai mah se kei chuan ka pawmpui lo a, a la lang tharsam sar a, a engkim a la dik a, a ke pawh a la rang a, kum 38 ni tura rin harsa a la ni,” tiin rawih chhunzawm tawh loh atana a la pamhmai dan a sawichhuak.
Chutih rualin, a contract neih lai han pawtsei leh ngawt dawn se hnahthar leh thangthar lo lang zel kara kum 40 tling hnai tawh kawl chhunzawm ngawt mai chu manager tan pawh a risk a sang ve bawk si a, engtiang takin nge a contract tawp mai tawh tur chu an kalpui dawn tih pawh Italian coach hian a la ngaihtuah fel hlei thei lo niin a lang.
Pathianni zan inkhelah khan England midfielder Jude Bellingham hmuh tur a la awm lo cheu a, tun kha a zawna Real game thum a khelh lohna a tling ta a; lei fuh Bellingham theih loh laia Croatia midfielder lo awm hlauh hi title an beiseina kawnga Madrid club meichher chhawmnungtu pawimawh a ni ngei ang.
Bernabeu inkhelah khan Modric-a goal luh hmain Lucas Vazquez chuan hmahruaina goal a khung zet a, rei tawk fang video assistant referee kaltlanga endik a nih hnuah Real full-back goal intintuah laiin Sevilla forward Youssef En-Nesyri lakah home defender Nacho a ‘foul’ tih nemngheh a ni a, Vazquez-a goal ziahluh a ni lo.
Carlo Ancelotti team tan Vinicius Jr leh Federico Valverde-te pawhin goal an khung teuh hle a, second half tir lamah goal ban an chhuihper.
A club hlui hmachhawn tura Santiago Bernabeu a lawi leh zanah Real great hlui Sergio Ramos chuan Sevilla tlarhnung a khaikhawm tha khawp mai a, mahse, a team-mate hlui Modric erawh a dang zo ta ngang lo a ni.
Ti hian, khelh 26-a point 65 neiin Real Madrid hian anmahni hnaihbertu Barcelona lakah point riatin hma an hruaifal a, nizanah Girona an chak chuan Barca lehpelin Real nena an inthlauhna pawh point sarihah an pawthnai ang.