Mohammad Yunus-a’n thuneihna chang ta

Muhammad Yunus hmangin Bangladesh chuan kum 15 chhung autocratic rorelna hnuaia an awm tawhna thingthlain hruaitu thar hmangin hmeichhiate chuan society-ah thuk zawka inrawlhna an neih theih a beiseiawm tawh bawk.
Tun dinhmuna Bangladesh kaihruai tur chuan Mohammed Yunus, university professor of economics ni thin, ‘Banker to the poor’ an tih phahna Grameen bank dintu ni bawk, academic aia social entrepreneur leh civil soceity leader anga hriat lar zawk tluka tha an awm chuang lo. Political party te a rinna nghah ngam miah lohna ram ni mek Bangladesh-ah interim government kaihhruai tura thlan a ni ta a ni.
Civil society ten hmahruaiin Yunus tluka Bangladesh civil soceity group-a hming langsar an awm chuang lo. Sheikh Hasina sorkar paihthlak a nih theih nana thisen tam tak chhuah tu zirlai tena an thlawp a ni bawk.
Interim leader atana rawttute pawh zirlaite niin midangte pawhin an thlawp nghal var a ni.
Khawvel hriata lar Grameen Bank din a nihna chhan ber chu banking system-in miretheite tan hmun a pek ve loh vang a ni.
Yunus chuan Bangladesh a thawkrim ber berte chu miretheite niin mahse retheihna ata an talchhuah theih lohna chhan chu an leiba vang a ni tih a hmuchhuak a. Chutiang bawkin miretheite chu credit mamawh ber ber an nih laiin eng bank mahin an puktir duh lo tih a hmuchhuak bawk.
A tirah chuan a hmingin sum a puk a, chu chu miretheite hnenah a pukchhawntir leh a. Miretheite chu sum puktir tlak an ni tih a hmuchhuak zui ta a ni. Chumi hnuah state-owned agricultural bank kaltlangin hma a la leh a, a hlawhtlinpui leh a. Mahse, sorkar ber chuan miretheite hnena micro-credit pek chu a duh lo tih a hriat hnuah a social business – Grameen Bank chu a din ta a ni.
Kum 2006 khan a microcredit revolution kalpui hmanga hmeichhe tam tak te eizawnna siamsaka entrepreneur lama an inrawlh nasat theih nana hma a lakna avangin Nobel Peace Prize hlan a lo ni tawh bawk.
Microcredit hmanga miretheite tanpuia rethei bakberh ata khaichhuah chuan sawiselna a tawk lo bik lo. Mahse, Bangladesh hmeichhia ten an hlawkpui hle a, conservative Islamists te erawhin an duh lo hle thung.
Yunus-a social entrepreneurship chu pro-market anga ngaih a ni a. A international profile vangin US leh European Union te chuan tun hma zawng aiin Bangladesh an ngaihven phah bawk. Development fund a neih theih nan Hasina erawhin China leh India a be tha thung a, tunah erawh Bangladesh chuan US lam a hawi viau thei tura ngaih a ni.
Bangladesh sorkar tharah China chuan tlaktlum a tum viau dawna ngaih a ni a, India chu Hasina thlawp tlattu a nih rualin democratic West te nena strategic partnership kalpuitu an ni tho bawk a, khawthlang ram te chuan China san zel an duhlo bawk. Chuvangin India chuan thlawp teh mahse Bangladesh mipui tena an paihthlak Hasina kaihhnawih chu thlawp bur thei a ni lo.
Yunus-an politics lama a hawi lam chu interim government asset a ni dawn a. Bangladesh pian tirh lai vela US-a economics department enkawl laia Bangladesh a let leh a ni a.
Sheikh Mujibur Rahman an ‘new nation’ a din tuipuitu a ni. Mahse, politics luhchilh duh lovin Awami League (AL) emaw Bangladesh National Party (BNP) a zawm lo ve ve. Awami League sorkar Hasina kaihhruai ngat phei chuan Yunus chu an teithei der lo bawk.
Hasina kha Bangladesh democratic nature tichhe vektu anga ngaih a ni a. Kum 2014, 2018 leh 2024 inthlanpuia chakna a chanah elpui mumal a nei lo, opposition tena inthlan an boycott a ni deuh vek a. Tuna a sorkar tlukna chhan pawhin pawnlam ni lovin chhunglam atanga irhchhuak anga ngaih a ni.
Autocratic taka rorelna a kalpui miau avangin khua leh tui te aiawh chu an hla tial tial a. Chumai bakah Hasina sorkar thlawptu senior official te eirukna kaihhnawiha bitum an ni chuan rah tha a chhuah bawk si lo.
Hasina berin eirukna nuai bo an tum avanga senior official te mana thubuai siamsak an ni an tih rualin a rorelna hnuaiah eirukna a nasa lutuk bawk si. Chung karah chuan official te chuan Hasina sorkar humhim duhna an nei lo tih a ni bawk.
Hasina sorkar chu a chhungril atangin a kehchhia a ni ber a, Liberation War of 1971 a beitu freedom fighter te thlah kal zelte tana sorkar hnaa 30% hauhsak thiah ngiatna chu unemployment nasa lutukin a hrin a ni. Hasina chuan quota system nuai bo ngiata zirlaite lungawilohna lantirna chu a namnul bawk a, chutak chu a sorkar paihthlaka a awm chhan a ni ta a ni.
Anti-reservation protest avanga mi 500 chuangin nunna an chan hnuah Sheikh Hasina chu an ram tlanchhuahsan lo thei lova siamin a awm zui ta a, India ramah a tlanchhe ta ringawt mai a ni.
Tunah erawh Bangladesh thar din tumnaah Yunus chuan interim government a kaihhruai ta mek a. Tun hmain Bangladesh in sipaite kaihhruaina hnuaiah independent election commission te pawh lo nei tawhin ‘peaceful transfer of power’ hlawhtling taka kalpui a lo ni tawh thin a, chu chuan democracy a sawhnghet tawh thin. Yunus kaihhruai interim sokar hian chutiang chuan hma a la dawn em tih chu khawvel thlir mek a ni.