Moldova-ah pro-EU party ten kawng zawh

Moldova capital Chisinau-ah chuan pro-EU rally liantham takin an ram president Maia Sandu huaihawta neih a ni.
Sandu-an langsar taka EU member nih a duhna chu thlawpin mi 75,000 chuang an pungkhawm a ni.
A pro-Western sorkar chuan a hma pawhin Russia chu Moldova a pro-Russian opposition Sor party te thlawpa buaina siam tumah a puh a. Moscow erawhin a pha thung.
Sandu chuan an ram chuan a him chin ringawta thil thlir a awm mai mai a duh tawh lo tiin a sawi a. “Europe daipawna awm reng kan duh tawh lo” tiin a sawi a. Moldova chu kum 2030 hmaa European Union ram nih tir hman ngei an tum thu a sawi bawk a.
Moldova chu ‘Kremlin-in a blackmail nih an duh lo’ tiiin rally a pungkhawm te hnenah a sawi a mipui te chuan EU flag te vaiin pro-European thlawpna lam an aupui bawk.
Kumin February khan Sandu chuan Russia chu a sorkar paihthlak tuma hma la tia sawiin ruahmanna an siamah opposition tena lungawilohna lantira constitutional order namthlak an tum tiin a lo sawi tawh a ni.
Hei hi Russia foreign ministry chuan chhangletin ‘behchhan awm lo leh engmah thutak awm lova inpuhna’ tiin a sawi thung.
Moldova hi Soviet Republic hlui niin mihring 2.6 million vel cehnna ram niin nikum khan EU zawm an dil a, June 2022 vek khan candidate rama puan a ni zui a ni.
Russia-n Ukraine a run hnuah ram 27 intel khawm EU bloc zawm duhna leh tumna chka zawka kalpui a ni a, chutih laiin Russia chuan a vau ve reng thung.
Ukraine indona pawh a tuar nasa ber pawl ni rengin Russian missiles te chuan Moldovan airspace an lut fo nia sawi a ni a.
Moldova hi Ukraine leh Romania ram inkara awm niin Russia gas a innghat tlat a ni thung a, hei hi Moscow chuan hrechiangin nikum khan a gas pek thin pawh a zahveah a tihniam a.
Hei vang hian lungawilohna nasa tak gas leh electricity man sang avanga kalpui a ni a, hei vang hian Moldova prime minister Natalia Gavrilita chuan kumin kumtir khan a ban phah nghe nghe a ni.
Rally neihnaah hian European Parliament President Roberta Mersola chuan mipui pungkhawmte hnenah thusawina a neihah Russia vauna hnawla mipui pungkhawmte chu lawmthu a hrilh a.
Moldova hmalakna chu lawm taka an pawm tur thu leh Europe-ah a behin Moldova chu a chak zawk dawn tiin a sawi bawk a. Moldova sorkar chuan EU-in a duh dan angin reform an kalpui tan mek tiin a sawi bawk.