Monaco inkhelh zirtirtu Real Madrid!

Monaco inkhelh zirtirtu Real Madrid!
Tualchhung league lamah pawh hmahruaitu Barcelona nen point khat chauha an inthlauh tawh laiin Europe lamah pawh Real Madrid-in lawmna tur an neih belh zel a, Thawhlehni zann khan 6-1 tehrenga Monaco sawp chungin manager thar Alvaro Arbeloa hnuaia an Champions League game hmasaberah hnehna nuamsa an chang.
Santiago Bernabeu khelmuala Uefa Champions League season kal lai league stage inkhelah khan Kylian Mbappe chuan goal nih thawhin, tun season Champions League kal laia match ruk a khelh tawh atangin goal 11 teh meuh a khung tling ta a, top scorer kal lai a ni mar zel.
France captain hian minute ngana lekah captain Federico Valverde siamsak atangin goal hmahruai a tilut a, minute 26-a a goal khat dang nen mualneitu team-in half time-ah si hnih faiin hma an hruai phawt.
Second half tir lamah Argentina international kum 18 mi lek Franco Mastantuono chuan Real goal thumna thawhin, a hnu lawkah West Ham defender hlui Thilo Kehrer-a own goal hmangin Madrid goal lina a hmin zui leh.
He mi hnu hian Vinicius Junior-a goal lawm lai hmuh tur awm zui lehin, minute 72-ah a hma deuha Real Madrid goal kham chhuihper dawp tawh Jordan Teze chuan Monaco si phurh pakhat sut then ve bawk mah se Jude Bellingham chuan he inkhela goal hnuhnung ber leh an goal rukna ni zui ta a thun a, January ni 12 maia Xabi Alonso thlaktu Arbeloa hnuaiah Spanish giants an harh thar chho tan tlat!
England midfielder Bellingham tan tun kha kumin chhunga a goal hmasaber a ni.
Spanish Super Cup final-a an hmelma lian ber Catalan-ho an ngam loh hnu khan Real thuneitute chuan an defender hlui Spaniard Alonso an petchhuak a; boss thar hnuaiah La Liga lama Barca hmahruaina an chhuhsak lek lek tawh a; tunah Champions League last 16 lut thei turin kawng dik an zawh chho leh nghal mek.
Alonso an ban hma khan Arbeloa hian Real B team a kaihruai thin a, Copa del Rey last 16 match-a 3-2-a second-tier side Albacete an hneh loh hnuah si hnih faiin La Liga lamah Levante hneh bawk mah se Liverpool leh Real defender hlui Alonso an ban ta si a, first team enkawl turin an hlang chho ta a ni.
15-time European champion hian Bernabeu chhunga mipui 73,599 zet pungkhawm hmaah hnehna nuamsa an chang a; goal hmahruai thawhtu Mbappe kha Monaco-a a career bul tan ngat niin, kum 2013 khan kum 14 mi lek niin an senglut a, club lianin an chhuhsak hnuah a club hlui hi Paris St-Germain leh Real thuam inbel chungin vawi 15 a hmachhawn tawh a, tah chuan goal 13 a thun tling tawh.
Champions League game sarih an khelh tawh atanga point 15 hum chungin Real hian table-ah pahnihna an luah a; January ni 28 khian away-ah Benfica an luhkhung leh ang a, an chak leh chuan two-legged knockout play-off khelh ngai loin last 16 an lut tawh ang.
Champions League point kua nen Monaco thung hian table-ah 20-na luahin, play-off hmun chang pha tur chuan an hmabaka Juventus an mikhual hunah hian chak an mamawh tawh ang.