Money league-a a sangber luahtu Real Madrid
Infiamna thlura sum che vel zirchianga kum tina an hmuh dan puangzar thintu Deloitte chuan an zirchianna thar ber behchhanin Deloitte Football Money League 2025 an tarchhuak leh ta a, 2023-24 Champions League trophy dawngtu Real Madrid chu kum liamta chhunga football club zinga sum lalut hnem ber ni lehin, kum khat chhunga euro vaibelchhe khat lalut tling football club hmasaber an ni nghal bawk.
Record siama Champions League title vawi 15 la thei awmchhun Spanish club hian La Liga leh Champions League trophy an lakkawp avangin Deloitte’s Money League-a a sangber nihna an humhim thei a; an chhut sak dan chuan 2023-24 season-a an sum lakluh (annual revenue) zat chu 1.05bn euros (£883m) a ni hem mai!
Manchester City (£708m) chu pahnihnaah awmin, Etihad club hian season liamta khan a zawn zata a tum lina atan Premier League title an chang leh a, Club World Cup leh European Super Cup trophy hawntu an ni tel bawk.
Paris St-Germain (£681m), Manchester United (£651m) leh Bayern Munich (£646m)-te chu top five awhkhattute an ni.
Kum 2011 hnu lama a vawikhatna atan season liamta khan Aston Villa chu Europe-a inkhel thei tur khawpin an rawn invawrh a, chu chuan Money League-ah hian top 20 a hruai thleng a, top 20-a lang Premier League club pakaw zingah telin, a dangte chu Arsenal, Liverpool, Tottenham, Chelsea, Newcastle leh West Ham-te niin, an dinhmun ngai an luah vek.
Lyon chu a sang 20 zinga lang thar dang awmchhun niin, Villa nen hian Napoli leh Eintracht Frankfurt an nekchhuak.
Top 20 club-te sum lakluh (revenue) hi 6% (£9.47bn) laia sangin, record thar a ni.
Top 30 lamah Premier League club dang panga lang bawkin, chu’ng zingah chuan an club history-a a vawikhatna’na Europa League khel Brighton (21st) an tel a, a dang palite chu – 26-na leh 29-na inkara awm Crystal Palace, Everton, Fulham leh Wolves-te an ni.
Deloitte hian kum khat chhunga sum hailut tam zual hmeichhe football club 15-te dinhmun an zirchianna pawh tarchhuak nghalin, a vawikhatna atana he’ng club-te sum lakluh belhkhawm hi euro maktaduai 100 aiin a tam a, a sanna hi 35% zet a tling.
2023-24 Women’s Champions League trophy kawltu Barcelona (£15.1m) chuan season liamta khan trophy dang pathum la bawkin, kum thum chhung chu a zawnin Deloitte Money League-ah hma an hruai ta.
Arsenal hmeichhiate chuan pangana atangin pahnihna an luah chho a, an sum lakluh belhkhawm hi £15.1m niin, an hnuaiah Chelsea (£11.3m), Manchester United (£9m) leh Real Madrid (£8.9m) an inthlarthla.
Money league-a a sangber luahtu Real Madrid
Get real time updates directly on you device, subscribe now.
Prev Post