Monitoring…

Chief minister kaihhruaiin Mizoram State Project Monitoring Committee din a ni a. He monitoring committee hi state chhunga hmasawnna hnathawh mekte enzui a, viltu tur an ni ber a. Hmasawnna hnathawh mekte chak taka a kal a, dik tak leh tha taka hun tiam chhunga zawh a nih theih nan he committee hian a endik reng dawn tihna a ni bawk awm e. Committee-ah hian party aiawh te, tlawmngai pawl aiawh te, kohhran aiawhte an tel a, a tul angin member hi la ruat belh theih a ni a, thuneihna zau tak an nei a ni.
A dinna a la rei lo bawk a, he committee hian eng chenah nge hma a lak tawh a, hna thawk tha lo han zilh ngai deuhte an hmu tawh em tih hriatna hman pawh a la ni chiah awm lo e. Hetianga member huap zau leh thuneihna sang tak nei committee hian awmzia thui tak a nei turah ngai ila. A nihna tur anga an thawk a nih phawt chuan eirukna vengtu tha tak a ni thei ngeiin a rinawm.
Chutih rual in, he committee a awm avang hian mipui lam hi kan tawmim mai ang tih a hlauhawm a, hmasawnna hna thawh dana thil dik lo leh felhlel a awm nia a lan phawt chuan, en liam mai lova, monitoring committee hrilh hriat lamah taimak kan chhuah a pawimawh dawn a, chu chu ram leh hnam thatna tur leh hmasawnna tur ngaihtuahtu khua leh tui tha tihtur dik tak a ni. ‘Monitoring committee an awm a, lo buaipui mai teh se…’ ti liam mai lo leh thil dik lo kan hmuhte kal pel mai lova, ‘monitoring committee member-ten an lo hmu fuh lo palh ve thei a…’ tia zualko lama kan lo taimak a sawt hlein a rinawm.
Sawrkar leh mipui thawhhona tha hi a pawimawh takzet a. Khawtlang pawhin mahni khawtlang huam chhung theuha hmasawnna hnathawh mekte lo bengkhawn a, hnathawktute hnathawh dan lo mitsir a, thil dik lo leh felhlel a awm em tia kan lo ngaihven phawt chuan, hnathawktute pawh an inthlahdah ngam lo ang a, tha lo leh dik lo an ti ngam lo ang a, chu chuan hmasawnna tluantling a hring chhuak mai dawn tihna a ni.