Monterrey tana goal khungtu kum 39 mi Ramos

Monterrey tana goal khungtu kum 39 mi Ramos
Fifa Club World Cup group stage khelh mekah nimin, Nilaini khan kum 39 mi ni tawh Real Madrid fedender hlui Sergio Ramos chuan Mexican club FC Monterrey tan Inter Milan laka an hmahruaina goal khung mah se Serie A team hian chawlhlawk dawnah an siphurh an sut a, goal khat ve ve thungin team pahnih an inhnehtawk.
Spaniard Ramos hian 2023-24 season tawp ruala a Sevilla contract a hman zawh hnu kumin February thla khan Monterrey hi a zawm a, California lama Group E match pakhatah Champions League runners-up Inter lamah goal a la thun zak zak a, Real thuam a inbel laia vawi li ngawt a lo champion tawhna Club World Cup kha a ni miau a, a la tlangnel thawkhat hle niin a lang!
Veteran defender Sergio hian first half minute 25-ah corner atanga ball chhuak chu khawng taka tauhin Mexican team hmahruaina a thawh zet a; thla hmasa Champions League final-a Paris St-Germain laka si nga fai tehrenga an tlawm hnua an inkhelh leh vawikhatnaah Italian club-in Mexican-ho laka tlawm an duh bik lo a, minute 42-a Lautaro Martinez-a goal hmangin an siphurh an sut a, second half-ah goal dang a luhbelh ta lo.
Hun pekbelhah Nelson Deossa chuan Monterrey chakna goal thun thei turin hun remchang hmu bawk mah se a sir pawn lam net a fuh a; Simone Inzaghi thlaka Inter manager a nih hnua a debut-ah Cristian Chivu chuan a team thar a chakpui zo lo phawt.
Champions League final-a PSG an hneh loh atanga ni thum hnu lekah inhriatthiamnain Inzaghi leh Inter Milan an inthen a, San Siro club-in Chivu an ruai ta a ni.
Mipui 89,702 lenna Rose Bowl Stadium kha a thawl khawp mai a, a chhunga leng zatve vel chauh (40,311) Monterrey leh Inter inkhel en tur khan a hmunah an fuankhawm!
Fluminense 0-0 Borussia Dortmund
New Jersey khawpuia MetLife Stadium lama Group F inkhelah Thawhlehni khan goal awm loin Bundesliga club Dortmund leh Brazilian club Fluminense an inhnehtawk a; Dortmund player thar Jobe Bellingham chuan a debut game-ah a club thar a chakpui zo lo.
Borussia Dortmund hian England Under-21s midfielder rawlthar kum 19 mi manah hian Sunderland hnenah sum hmahruai pound maktaduai 27 an pe phawt a, a chetthat dan azirin a man hi an la pekbelh leh thei dawn a ni.
He game-ah hian substitute bench thawhsanin England international Jude Bellingham-a nau Jobe hian khelmual a lut a, Germany rama a u sulhnu a chhui tan mek a ni.
Jude Bellingham kha kum thum chhung Dortmund lamah chamin, May 2023 kha Bundesliga club tana a inkhelh tawp ber a ni a, tunah a nauin a rawn thlak ta a ni.
Bellingham unau zinga naupang zawk hian Wembley khelmuala Championship play-off final-ah khan a team chu Sheffield United laka hnehna chanpuiin Sunderland chu Premier League kawtkaiah an kirleh theih phah a, Sheffield an hneh atanga ni 24 a liam leh rualin a Dortmund debut a nghakchhuak.
Kum 2023 final-a Manchester City hneh zo ta lo Fluminense khan German top flight team laka an starting line-up tarchhuahah kum 44-a upa ni tawh goalkeeper Fabio an telh a, he veteran tan Thawhlehni inkhel kha a career-a game 1,375 a khelh tlinna chiah niin, chuti ang kum ni tawh chungin German club lian lakah ‘clean sheet’ a la nei ta zak zak a ni!
Fluminense centre-back leh an captain ni bawk Thiago Silva kha September thla hian kum 41 a tling chho ve tawh dawn a, chuti chungin a la hriam hle a; ani pawh hi Ramos kan sawi ang bawkin Club World Cup-a mikhual lo zet, Chelsea thuam a inbel lai kum 2021-a Champions League leh Club World Cup trophy lo chawi kawp tawh a ni.
Inrinniah team pahnih hian match an khel leh dawn a, Borussia Dortmund chuan Cincinnati khawpuiah South African team Mamelodi Sundowns an tum ang a; Fluminense lamin New Jersey khuaah South Korea aiawhtu Ulsan HD an khel ve thung ang.
Thawhlehni khan Group F inkhel dangah Ulsan hian sikhat faiin Sundowns hi an hneh a, kha inkhel kha stadium chhungah mipui 3,412 chiahin an thlir a, tun torunament kal laia inkhel entu tlem ber an la ni.
Orlando khaw khelmual Inter & Co Stadium-a inkhel tur kha an ram sanaa zan dar 6-a tan tur a nih laiin khaw awm dan chiang lo leh thlipui tleh thei warning avangin darkar khat chuangin an tan tlai a, referee Clement Turpin chuan kick off dawnah player-te chu khelmual chhuahsan turin a tirbo leh rih a ni.