Dr. C. Lalrampana
-- Advertisement --
A KAMKÊUNA
Mizoram chanchin hi hriat tur a tlem hle. Kum 1750 leh 1850 inkar khan Mizo (hmanlaia ‘Lushai tia’ koh hnamte hi kan bul hnaia Chin Hills atangin kan pem a, indigenous peoples-te chu kan thunun a, anmahni khawtlang nunah kan inla lut ta a. Mizo chuan hereditary chieftainship 300 vel atanga innghat autocratic political system kan siam a ni ngei ang. Kum zabi 14-na tir [1 January 1301 – 31 December 1400] khan Indo-Burma ramri Chin Hills-ah kan awma ngaih a ni a. Khua kan din a, kan hnam hming ‘Seipui, Saihmun leh Bochung’ tia koh thin kan ni. Chin Hills tlang leh hmun harsa tak Khampat khawpui vela khawsa thin kan niin chhut a ni. China thlah Mongoloid kan nia ngaih a ni a; a hnuah India ramah kan insawn a, tuna kan awmna hmunah hian kan insawn ta a nih hmel. Mizote hi China rama Yalung lui kamah Shinlung emaw Chhinlungsan emaw atanga lo kal kan nih a rinawm. USA chu
Explorer Christopher Columbus (1451–1506) khan kum 1492-a a lawng Santa Maria-a America ram ‘khawvel thar’ ‘discovery’ avangin hriat a hlawh hle a, an lo chhuahna a chiang tawk a ni. Mizote tobul erawh kan chiang ruai lo, a hre ril ber pawhin- “a ni awm e, niin a lang, nia ngaih a ni, a nih hmel ber” ti mai maiin kan thlahtute leh kan tobul, kan lo zik chhuahna dik tak leh kum pawh kan hre thei lo. Thil zahthlak tak chu a ni phawt mai! Chiangkuang zawka chhui theih ni se a va duhawm tehlul êm! Hnamdang zingah khawsain kan zik chhuahna min han zawt ve bawk thin a, chhan ngaihna a vang thin hle.
KAN RINAWM EM?
Assam State-a ka zinna khaw pakhatah chuan hnam chihrang hrang an inchenpawlh a. Pastor pakhat hnenah- “Hei hnam tin chi tin in inchenpawlh mek a ni a, tu hnam nge rinawm lo ber?” tiin ka zawt a. Ani chuan tawitein, nui deuh sukin, “Muslim” tiin min chhang a. A dik turah ka ngai mai a, mak ka ti lem lo. Mizote hi hnam huaisen mi lu la hnam, hnam fing, hmeltha, taima, tlawmngai, rinawm tak kan ni. Pipute hunah phei kha chuan chhung tin mahni intodelh vek, mahni khamkhawp thar thei, zu in thiam leh hmang thiam, pur inchawtawn thin, intanpuitawn thin, thingfak [thingfak tala] hmanga kawngkalh thin; khawtlang inthununna tha tak nei; zawlbuk Administration hlawhtling taka kengkawh thei kan ni a; Lal rorelna nen felfai taka inenkawl thin kan ni. Thuhriltu tam takin hnam rinawm lo, chhe lailet der anga an aupui chiam chiam thin hi chu a dik lo hulhual a ni. Mi rinawm lo leh misual zual erawh engemawzat an awm ve ngei a, mahse, mihring nuai 13 awm mek zingah hian 90% vel chu mi rinawm leh mi pangngai kan la awm ngei ang. Misual leh rinawm lo tlemte avanga kan hnam pumpui a chhe thei ang bera mahni hnam insâwt hi thil tha leh thil dik a ni lovang. Chuvangin, Mizote hi kan la rinawm thawkhat hle a ni.
ENGVANG NGE NI TA?
“Assam-Lushai District (Acquisition of Chief’s Rights) Act, 1954” an tih leh a hnua 1955-a siamthat a nih dan hmangin; Mizo lal rorelna [chieftainship] chu tihtawp a ni a. Tunlai parliamentary form of administration Mizorama a lo thanlen chhoh zelna hi kum 1952-a Mizoramin District Council dinhmun a neih atanga intan a ni a, chu chu Lushai Hill District (Chiefship Abolition) Act, 1952 Assam Legislative Assembly-in January 1,1953 atanga a hman tan vang kha a ni. Kum 1894 khan Arthington Aborigines Mission-a English Baptist missionary pahnih J.H. Lorrain leh F.W. Savidge-a te chu Lushai Hills (tuna Mizoram)-ah an lo chhuak a, Mission hna an thawk tan ta a. Zirna leh sakhaw thar a lo luh chuan Kristian sakhua chuan kan thlirna leh Mizo khawvel thlirna a thlak danglam ta a ni. Kum 1953 hma lam zawng khan kan kristianna kha a la tak tha a, mahse, lal rorelna titawpa mahnia politik rorelna kan kalpui tan atang hian vaiho politik tuinuin min chim tak avangin zawi zawiin kan kristianna rawn pawlh dalin chawhchawrawih nunah kan tla lut ta a ni. Heta tanga kal chho zelin tuna kum 130 zet kal mekah hian kristian 87.16% kan lo ni ta. A lawmawm hle. He politik inthlak danglamna hian kan ramah hnamtin chitin a hip luh tak avangin hlemhletna, eirukna, rinawmlohna, mahni hmasialna leh sual chitin reng a rawn kalpui a, chu chu kristiannain kan do hneh si lo. Kan puithiam leh thuriltu ropuite lahin Pathian hmangaihna leh khawngaihna (Joh 3:16) ringawt sawiin Pathian chu mei ang, mi kannral hmang leh phuba lak hmang leh a hlauhawmna an sawileh ngai si lo. [Heb 12:29; ex 1:2]
Mahni inthiamchawpin nun chawhpawlhin ringtu kan tam tlurh ringawt a, chu chuan ringtu dazat, ringtu depde, ringtu fekfawn, ringtu dawizep, ringtu sadukai leh pharisai, ringtu rinawm lo min chhuah teuh phah ta a ni. Lal rorel hun lai leh zawlbuk Administrative system hun lai khan ‘Thingfak tala’ [firewood lock] mai mai hmangin nileng zankhuain in an chhuahsan ngam a, engmah an inruksak ngai lo. Parliamentary form of administration leh kristianna a lo inlãr hnuah erawh tala tha leh lian tak tak magic lock thlengin hmang mah ila kan him zo tawh lo. Hei vang zawk hian Mizote hi rinawm lo angin kan lang ta mai zawk a ni.
ENGE PAWIMAWH TA CHU?
Mimal nungchang inthlak dang lamna (moral reformation) hi kan mamawh ber chu a ni ta. Pipute khan-”Hmel chu a siam danglam theih loh a, nungchang erawh chu a siam dang lam theih a ni,” an ti thin. Kan pian zia, pianphung, hnam zia leh hmel, hmai tlangte tihdanglam theih ni lo mah se, kan nungchang leh khawsak dan erawh a thlak danglam theihin a siam that theih a ni. Eiruk duhna rilru (moral corruption)kan put mek te, hlemhletna leh rinawmlohna kan neih hrang hrangte hi awareness campaign hmanga Sorkar, NGO leh kohhran hmalaknaa siam danglam [reform] theih a ni. Kohhran leh rawngbawlna hi lanmawi nan mai hmang lovin takna leh dikna nen ringtu nun dik nunpui ngam ila, Kristian nun hmasa kan hloh takte kha chhar tharleh ila “moral reformation” dik tak kan nei thei ang.
A TLÃNGKAWMNA
Hnam timualphova tihminghliautu ber chu vantlang sualna (Social Evils)hi a ni. Mizoramah hian vantlang sualnaa inhnamhnawihte hi an langsar a, mahse, mi tam tak an ni lo. Khaw tin, veng tinah a siam tha tur pawl ‘Anti-Social Evils Forum (ASEF)’ dinin theihtawpin suat rem tum ila, dim miah lovin an phu tawkin hrem ila, lung inah khung ila, tha thlah hauh lovin do tlang ila, kan kristianna pawh hi a takin kalpui ngam ila, lanmawi nan leh inchei nan, chapopui nan hmang lo ila, eiru leh nawhchizuarte sawmapakhat hnâwl ngam ila, thawhlawm ringawt atchilh lo ila, takna leh dikna, rinawmna leh taimakna nen Kristian nun dik tak nunpui ngamin kan nungchang thlak danglam (moral reform) ngam ila; kan zonunmawi tlawmngaihna, rinawmna, takna leh dikna nen kan ram nun hi par ang vulleh turin theihtawp chhuah ila zoram thar, zoram nuam, vanram tlafual lei edenthar kan din leh thei chauh ang. Chuvangin, mipui sorkar pawh hian Moral Reformation leh Social reformation & transformation hi ngai pawimawhin theihtawp chhuahin thapui thawh bawk se kan hnam hmel hemna zawng zawng hi a dam leh ang a; rinawm lo awmkhawm anga kan lanna zawng zawng hi hliahkhuhin a awm thei dawn a ni. Moral Refomation hi mimal tinin keimahni theuha kan tih theih a ni a; chhung tin atanga tanin theihtawp chhuahin hma la ila, hetianga theihtawp chhuaha kan beih theuh chuan Zoram hian a takin hma kan sawn ang a, kan hming than mawina thin kha lova ro phum ruk angin kan hai chhuak leh thei ngei ang.