HIV/AIDS leh Mizoram

Mizoram State AIDS Control Society chhinchhiah danin, 1990 October atanga 2023 September thleng (kum 33 chhung) khan Mizoramah HIV/AIDS 29,514 an awm a, HIV/AIDS thihpui hi 4703 an awm tawh a; heng zinga 80 chu naupang an ni. HIV/AIDS kai zingah hian nu naupai 2,434 an awm a; kum 16 kalta chhung khan nu nau paia HIV hmuhchhuah chu kum tin za chuang an ni.
A chawhrual zawngin chhut ta ila: Kum 33 chhung khan ni tin HIV hrik pai mi 2.4 hmuhchhuah ziah ang a ni a. HIV/AIDS vanga thi chu ni li danah pakhat zel (15.93%) ang a ni. Nu, rai laia HIV kai hi 100 zelah 8.24 (%) an ni a. Nu nau pai laia HIV hrik kai hi kum khat chhungin ni thum danah pakhat zel hmuhchhuah ang a ni bawk.
Naupang kum 14 hnuai lam HIV hrik kai pawh 753 an awm a, hei hi 2,55% ang a ni.
Mizoram hi a mihring cheng tam dan nena chhuta HIV hrik pai hluarna ber kan ni a, thisen test tawh atanga 2.70% in HIV an kai a. Mizoram dawttu Nagaland chu 1.36 niin, a pathumna Manipur chu 1.05% a ni. A palina Andhra Pradesh chu 0.67% niin Telangana 0.47% leh Karnataka 0.46% te chu pangana leh parukna an ni. Heta tanga hmuh theih nghal mai chu, Mizoram hi kan sang fal nal nal hle tih hi a ni.
Tunhma chuan Nagaland leh Manipur dawtah pathumna kan hauh thin a, hun a lo kal zel a, Mizoram hi pakhatna kan lo ni ta a. Pakhatna kan nih dan hi, tunhmaa keini aia sang zawkte hi an tlakhniam chak tak em vang niin a lang.
Chumi awmzia chu, HIV/AIDS donaah hian hma kan la nasa em em chungin, a tlahniam zawngin kan kal chak ve vak lova, state dangte erawh an tlahniam chak ta a ni.
Tuna tha lo leh em em ta chu, nu nau pai lai ten HIV an kai nasa leh, kumtling lo zingah HIV hrik pai an pung zel ta hi a ni.
HIV/AIDS dona langsar taka kan kalpui mup mup chung pawha a zual zawnga kan kal zel bawk si hi, survey/research nen beihpui thlak leh deuh chu a tul hle tih a lang a ni.