Morgan Wallen album “I’m the Problem” No.1-ah a debut

On May 27, 2025 21 0

Morgan Wallen album “I’m the Problem” No.1-ah a debut
Country star Morgan Wallen album thar “I’m the Problem” chu Billboard 200 (albums) chart No.1-ah a debut a, a album No.1 kai thei pathumna a ni. Hetihrual hian BTS member Jin album ‘Echo’ pawh top five-ah a debut bawk e.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Morgan Wallen “I’m the Problem” hi 4,93,000 hralhin, kumina album kar khat chhunga hralh tam ber a la ni a, chung zinga 3,57,000 chu streaming atanga album hralhna tlukpui (on-demand official stream maktaduai 462.63) niin, album tak tak hralh chu 1,33,000 a ni a, album-a hla a mala hralhna atangin 3,000 a tling thei bawk.
Morgan Wallen hian No.1 album pathum a nei tling ta a, a hmasa ber chu 2021-a a album “Dangerous: The Double Album” niin, a zawnin kar 10 a No.1 thei a, a pahnihna 2023-a a tlangzarh ‘One Thing at a Time’ chu a zawn lovin chart-ah kar 19 a No.1 thei bawk. Heng album pahnih te hi chart top 50-ah an la lang char char a, One Thing at a Time phei chu tunkar chart-ah No.4 a la ni nghe nghe a, Dangerous pawh No.12 a la ni.
Chart No.1 hlui SZA ‘SOS’ chu 47,000 hralh lehin No.3 atangin No.2 a kai thar leh ta bawk.
BTS member Jin album thar ‘Echo’ chu 43,000 hralhin, No.3-ah a debut a, he chart-a a album top 10 kai thei pahnihna niin, nikum November khan a album ‘Happy’ chu No.4 a lo kaipui tawh bawk.
Chart No.4-9 te chu No.1 hlui vek niin, Morgan Wallen ‘One Thing at a Time’ chu 42,000 hralh lehin No.4 a la ni a, Kendrick Lamar ‘GNX’ chu 41,000 hralh lehin No.7 atangin No.5 a kai thar leh a, Sleep Token ‘Even in Arcadia’ chu 38,000 hralh lehin No.1 atangin No.6-ah a tawlh a, Sabrina Carpenter ‘Short n’ Sweet’ chu 37,000 aia tam deuh hralh lehin No.8 atangin No.7-ah a insawn leh hret, PARTYNEXTDOOR leh Drake album ‘$ome $exy $ong 4 U’ chu 37,000 hralh lehin No.5 atangin No.8-ah a tawlh a, Bad Bunny ‘Debi Tirar Mas Fostos’ chu 37,000 tling lo deuh hralh lehin No.10 atangin No.9-ah a insawn leh hret bawk.
Fuerza Regida ‘111XPANTIA’ chu top 10 khartu niin, 32,000 hralh lehin No.6 atangin No.10-ah a tawlh ve thung.