Morgan Wallen “I’m the Problem” a No.1

Morgan Wallen “I’m the Problem” a No.1
Morgan Wallen album “I’m the Problem” chu Billboard 200 (albums) chart-ah a No.1 a, a zawn lovin he chart-ah hian kar 9 a No.1 tling ta. Hetihrual hian TOMORROW X TOGETHER, YoungBoy Never Broke Again leh Tyler Childers te pawh top 10-ah an debut.
Billboard 200 chu kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming leh albuma hla a mal a hralhna atanga album hralhna tlukpui te belhkhawm thin a ni.
Morgan Wallen “I’m the Problem” hi 1,43,000 hralh lehin, chung zinga 1,37,000 chu streaming (on-demand official stream maktaduai 180.43) atanga album tlukpui niin, album tak tak hralh chu 5,000 a ni a, albuma hla a mal a hralhna atangin 1,000 a tling thei bawk.
He album hi May thla tawp chart-ah khan No.1-ah a rawn debut a, a zawnin kar riat chhung a No.1 a, tunah a kar 9 nan No.2 atangin No.1 a kai leh ta a ni.
Morgan Wallen hian No.1 kai thei album pathum a nei tawh a, “I’m the Problem,” bakah “One Thing at a Time” leh “Dangerous: The Double Album” te niin, heng album pathum te chart-a an No.1 chhung belhkhawm chu kar 38 a tling tawh a, mipa zaithiam zinga album hrang hrang hmanga he chart-a No.1 nih rei theihah pangana a ni pha ta.
Mipa zaithiam he chart-a No.1 ni rei thei ber chu Elvis Presley niin, a album hrang hrang No.1 hun chhung belhkhawm kar 67 a tlin a, Garth Brooks (52), Michael Jackson (51), Elton John (39), Morgan Wallen (38), Belafonte & Drake (37 ve ve) ten an dawt.
KPop Demon Hunters soundtrack chu 93,000 hralh lehin No.3 atangin No.2 a kai thar leh ta a, he album hi a hmain No.2 a lo kai tawh a, kar kalta khan No.2 atangin No.3-ah tawlhin, tunah hian 4%-in a hralh a pung a, No.3 atangin No.2 a kai leh ta a ni.
K-pop group TOMORROW X TOGETHER album thar ‘The Star Chapter: TOGETHER’ chu 65,000 hralhin No.3-ah a debut a, chung zinga 62,000 chu album tak tak hralhna niin, streaming atangin 3,000 (on-demand official stream maktaduai 4.23) a tling a, he chart top 10-a lang thei album pasarih an neihna a ni.
Tyler, The Creator “DON’T TAP THE GLASS” chu 59,000 hralh lehin No.1 atangin No.4-ah a tawlh a, Justin Bieber “SWAG” chu 52,000 hralh lehin No.6 atangin No.5 a kai veleh ta bawk.
YoungBoy Never Broke Again album thar ‘MASA’ chu 49,000 hralhin No.6-ah a debut a, he chart top 10-a lang thei album 16 a neihna a ni. ‘MASA’ hralhna hi 48,000 chu streaming (on-demand official stream maktaduai 69.15) niin, album tak tak hralh chu 1,000 a ni ve thung.
YoungBoy Never Broke Again hian he chart top 10-a lang thei album ngahah Jay-Z leh Nas a nihrual a, hip-hop artist zinga he chart top 10-a lang thei album ngah lamah pathumna a ni a, Future (18) leh Drake (17) te a pha lo. Hip-hop chauh ni loah chuan The Rolling Stones-in top 10 album an ngah ber a, 38 an nei.
Tyler Childers album ‘Snipe Hunter’ chu 48,000 hralhin No.7-ah a debut a, 27,000 chu album tak tak hralhna niin, streaming atangin 20,500 (on-demand official stream maktaduai 26.14) niin, album-a hla a mala hralhna atangin 500 a tling thei bawk. Tyler Childer hian chart top 10-a lang thei album pathum a nei ta a, tun hi top 10-ah pawh a thlen san ber a la ni.
Alex Warren “You’ll Be Alright, Kid” chu 47,000 hralh lehin No.5 atangin No.8-ah a tawlh a, chart No.1 hlui JACKBOYS leh Travis Scott “JACKBOYS 2” chu 46,000 hralh lehin No.4 atangin No.9-ah a tawlh a, Ozzy Osbourne ‘The Essential Ozzy Osbourne” chu 46,000 tling lo deuh hralh lehin No.7 atangin No.10-ah a tawlh ta bawk.