Morgan Wallen ‘One Thing at a Time’ kar 7 a No.1 ta

Morgan Wallen ‘One Thing at a Time’ kar 7 a No.1 ta
Country star Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-a a zawna kar sarih a No.1-na a ni ta. Hetihrual hian Metallica album thar ’72 Seasons’ pawh No.2-ah a debut a, Taylor Swift album hlui ‘Lover’ pawh top 10-ah a rawn lang thar ve leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat-ah hian album tak tak hralhna bakah streaming leh album-a hla mal hralhna atanga album hralhna tlukpui te belhkhawm thin a ni.
Morgan Wallen ‘One Thing at a Time’ hi kar khat chhungin 1,66,000 an hralh leh a, chung zinga 1,51,000 chu streaming atanga album tlukpui (on-demand official stream maktaduai 201.71) niin, album tak tak hralh zat chu 12,000 a ni a, album-a hla mal hralhna atangin 3,000 a tling thei bawk.
Morgan Wallen album hmasa ‘Dangerous: The Double Album’ chu 2021 khan chart-ah kar 10 a lo No.1 tawh bawk a, tunah a album thar kar sarih a No.1 leh ta bawk a, tihian tun kum 10 chhunga album chart-a kar sarih chin No.1 thei pakhat aia tam nei thei pahnihna a ni a, hetiang tithei midang chu Taylor Swift niin, ani hian a album ‘Folklore’ chu 2020 khan kar riat a No.1 pui a, 2014-15-ah ‘1989’ chu kar 11 a No.1 pui bawk a ni.
Metallica pawh an album thar ’72 Seasons’ nen an rawn inlan leh ta a, 1,46,000 hralhin No.2-ah a debut a, an album chart top 10-a kai thei 12-na a ni a, chung zinga album pariat chu top 2 an kai vek a ni. ’72 Seasons’ hi kum sarih chhunga Metallica original album tihchhuah leh hmasak ber a ni bawk.
Chart No.1 hlui SZA ‘SOS’ chu 66,000 hralh lehin No.4 atangin No.3 a kai thar leh a, No.1 hlui bawk Taylor Swift ‘Midnights’ chu 60,000 hralh lehin No.3 atangin No.4-ah a tawlh a, chart No.1 hlui tho Morgan Wallen ‘Dangerous: The Double Album’ chu 49,000 hralh lehin No.6 atangin No.5 a kai thar ve leh ta bawk.
Luke Combs “Gettin’ Old” chu 43,000 hralh lehin No.7 atangin No.6-ah a insawn a, chart No.1 hlui Metro Boomin ‘Heroes & Villians’ chu 37,000 hralh lehin No.9 atangin No.7-ah a insawn a, No.1 hlui bawk Bad Bunny ‘Un Verano Sin Ti’ chu 36,000 hralh lehin No.10 atangin No.8-ah a insawn ve leh ta bawk.
Taylor Swift album, 2019-a No.1 lo kai tawh ‘Lover’ chu 34,000 hralh lehin No.12 atangin No.9-ah a invawrh thar leh a, he album hi Taylor Swift-in The Eras Tour a neih tan atangin hralh a kal thar leh ta riau a ni.
Chart top 10 khartu chu Melanie Martinez ‘Portals’ niin, 33,000 hralh lehin No.5 atangin No.10-ah a tawlh ta a ni.