Morocco an tla
Thawhleh zan khan Afcon 2023 last 16 khelh zawh a ni a, champion tura rinkai Morocco chu South Africa hneh lovin an tla ringawt. Morocco an tlak lai hian Mali in quarter-final an lut ve thung.
Champion tura rinkai ber zinga mi Morocco hian Stade Laurent Pokou-ah South Africa an hmachhawn a, hun pumin goal an thun thei lova, si hnih faia tlawmin a tla. South Africa hian World Cup 2022 semi-finalist Morocco lakah an khel tha viau a, inlehthalna lian an thlentir thei hial. South Africa tan hian Evidence Makgopa chuan minute 57-naah Zwane siamsak atangin hmahruaina goal a thun a, Morocco an barakhaih.
Goal chhuah hmasa zawkah tang a, si an phurh reng hnuin Morocco hian hun tawp dawn hnaiah penalty an hmu a, an si phurh sut theihna hun tha tak an nei. He penalty hi minute 85-naah Achraf Hakimi chuan goal ah a chantir thei lova, an hun tha a hloh. An si phurh sut teheihna hun tha an hloh hnuin an talbuai zui a, minute 90+4-ah Sofyan Amrabat hnawhchhuah a ni. Tam zawk an nih hnuin South Africa an phur leh zual a, goal pawh an thun belh thuai, Minute 90+5-ah Teboho Mokoena chuan an goal hnihna thunin, an chakna a nem nghet a. Champion tura rinkai Morocco chu si hnih faia hnehin, quarter-final an lut zui ta a ni.
Thawhleh zana inkhel dangah Mali leh Bukina Faso te chu Amadou Gon Coulibaly Stadium-ah an inhmachhawn a, inkhel hmuhnawm takah Mali in 2-1 in hnehna an chang.
Burkina Faso hian Mali lakah bul an tan chhe viau a, inkhel tan atanga minute thumna lekah Edmond Tapsoba chuan an lamah a ti-goal a, Mali hmahruaina goal a thunsak. Inkhel tantirhte atanga hmahruai Mali tan hian Lassine Sinayoko chuan minute 47-naah an goal hnihna a thun a, an hmahruaina a tizau. Si hnih faia an hnufual hnuin Bukina Faso in goal thun theihna hun tha an nei zui thuai a, penalty an hmu. He penalty hi Bertrand Traoré chuan minute 57-naah a pet goal a, an si phurh a sut. An si phurh sut zawh tumin tan khawh zui mah se hun tawp thlengin goal lut a awm belh thei tawh lova, Mali in quarter-final an lut.
Afcon 2023 quarter-final hi zirtawp zanah khelh tan a ni dawn a. Zirtawp zan hian Nigeria leh Angola an inhmachhawn ang a. Congo DR leh Guinea te an inhmachhawn bawk ang. Morocco hnawtchhuaktu South Africa in Cape Verde Islands an hmachhawn ang a. Mali in inelna thlengtu Ivory Coast an hmachhawn bawk ang.