Motion thlawp ngei tih fiahna Voice record a awm lo – MPCC

Parliament-ah Manipur buainaa NDA sawrkar rintawk lohna thehluhah, Mizoram MP-ten motion thlawp zawngin voice vote an pe tih sawi chu, video/ voice record a awm lo tih Congress party chuan an sawi.
MPCC thuchhuak chuan, Parliament-ah Manipur buaina chungchanga BJP kaihhruai NDA sawrkar rintawk lohna (no-confidence motion) Assam MP Gaurav Gogoi putluh sawiho a nihin, Mizoram atanga MP pahnih – Pu C Lalrosanga leh Pu K Vanlalvena te chuan NDA do zawngin voice vote an pe tih an sawi tih sawi nawnin, Prime minister Narendra Modi thusawiah Manipur buaina chinfelna lam hawi engmah a awm loh avanga eptu party intelkhawm – INDIA atanga MP-ten Parliament an chhuahsan avangin speaker-in voice vote hmangin thutlukna a siam a. Pu C Lalrosanga pawhin NDA thutna lama thu chungin, voice vote lak laiin sawrkar rin tawk lohna motion a thlawp niin a insawi a. Video record hriat tur erawh a awm lo, tih an sawi.
‘Lok Sabha MP Pu C Lalrosanga’n central BJP kaihhruai NDA sawrkar rin tawk lohna motion a thlawp tih thu hi ama sawi chauh mipuiin kan hria a, Citizenship Amendment Bill-ah Mizo mipui hnena a insawi loh dana a lo awm tawh avangin tuna a thil sawi pawh hi a ni ngei em tih rin a harsa hle,’ a ti.
BJP kaihhruai NDA sawrkar a thlawp lo takzet a nih chuan NDA chhuahsan mai chu thil nih dan tur zawk a ni tih MPCC hian sawiin, ‘Mizorama political party hrang hrang hian BJP thuhnuaia kun leh kun loh chungchang hi mipui hriatah kan dinna theuh chiang taka kan tarlan a hun tawh a. BJP kaihhruai NDA leh NEDA an duh loh takzet chuan Pu Lalsawta kaihhruai Congress party hmalaknaa din Mizoram Secular Alliance-a lo tel ve turin MNF hi kan sawm a ni,’ a ti.