Motorcycle-a tlan thui record siam

Kar khat chhung nitin motorcycle-in km 300 vel tlan ziah dawn ta ila kan peih lo ve khawp ang. Ventaka Karthik Tupili erawh hi chu ni 450 chhungin, nitin km 300 vel a motorcycle-in a tlan ziah a, km 1,40,094a thui tlanin record a siam. Karthik hi India ram chhunga vek a tlan a, India-a UNESCO World eritage site leh sakhaw lam hmun pawimawh hrang hrang te pawh a tawlh kim viau niin Deccan Chronicle chuan an tarlang.
Karthik chuan, “Tum mumal tak pawh nei loin ka awm a, ka pa nena kan titi dunna atangin eng emaw thil awmze nei tak han hlawhtlinpui ve duhna ka nei ta a. Ka pa chuan kan tum eng emaw tak kan tihhlawhtlin hian midang te pawh kan chophur ve nghal a, an tum ram thlentirtu kan ni thei tih a sawi thin. Tichuan, civil service lam ka an tinzawm ve a, mahse, ka hlawhtling lo a, chutah motorcycle a India ram fan kual a ‘mahni intihhlum venna’ lam chawi lar theihna kawng a awmin ka hria a ‘Dekho Apna Desh’ tih thupuia neiin, ka feh chhuak ve ta a ni,” a ti.
Record siam tura a thawhchhuah hmain ni 50 vel chhung chu a zinkawng a zawh tur leh kal dan turte ruahman nan a inbuatsaih a, kawng ngai zawh nawn miah si lo a km 1,60,000 tal tlan a Guinness World Records siam theihna kawng a zawng ta a ni.
A kalna tur kawng zawn nan GPS a mang a, darkar tin thlalak leh video lain, a thlen chin leh awmna te a document zel a, mahni chauha che chhuak a nih avangin a kalna apiangah sorkar official-te hriatpuina a la tel deuh zel bawk.
Karthik hi Mizoram-ah pawh rawn kal thlengin, a zin kawng zawhah hlauhawm leh harsa a tihte an zawh pawhin Mizoram kawng a sawi tel a, “Mizoramah ruah sur nasa avangin ka tluin ka tang nual a. Nikhat phei chu minute 90 chhungin km 1.6 chiah ka kal hman,” a ti.