MP hnawhchhuah zat 141 tling tawh

Nikhat thil thua Parliament rorelna a tel thei lo tura Opposition MP 79 lawih hnawhchhuah an nih hnuah nimin khan member 49 dang hnawhchhuah leh niin tihian tun session-a MP session laia Thu thei lo tura hnawhchhuah chu 141 tling tawhin a san ber a la ni.
Nimina hnawhchhuah zingah National Conference leader Farooq Abdullah, Congress leader Shashi Tharoor leh Karti Chidambaram, NCP’s Supriya Sule leh Samajwadi Party’s Dimple Yadavte pawh Lok Sabha Speaker Om Birla an House rorel tibuai tia a hnawhchhuah zingah an tel.
Opposition MP te chuan Parliament House pahnihah kar kaltaa Lok Sabha a security fel lo avangin lungawilohna nasa takin an lantir a. Union Home Minister Amit Shah chu security hlawhchhama mi pahnih tena Lok Sabha chamber luta somke canister an phuhchhuah theih chhan chu sawifiah turin an ngiat a ni.
Lok Sabha Speaker chuan House-a security kaihhnawih thil reng reng chu Secretariat mawhphurhna tia sawiin midang inrawlh a remti dawn lo a ti a. “Lok Sabha secretariat-ah sorkar a inrawlh thei lo. Kan remti dawn hek lo” tiin kar kalta khan Speaker Om Birla chuan a lo sawi tawh bawk.
Prime Minister Narendra Modi chuan Dainik Jagram newspaper ten an interview-naah Lok Sabha security breach chu ‘ngaihdam theih a ni lo’ tia sawiin chhui chian tur a ti a. Mahse, he mi chungchang hi sawiho leh inhnial a ngai lo a ti thung.
Kar kalta aTang khan House aTanga hnawhchhuah kalpui Tan a ni a. Security breach awm tukah Opposition MP te chuan Home Minister chu sawifiahna nei turin an ngiat nghal a. An chet dan a mawi lo tiin Lok Sabha MP sawm pathum leh Rajya Sabha MP pakhat chu hnawhchhuahin an awm nghal a. ThawhTanni khan Opposition MP ten lungawilohna an lantir hnuah House pahnihah MP 79 lai hnawhchhuah ni zuiin Thawhlehni khan 49 hnawhchhuah belh an ni leh a ni.
Heng MP 141 hnawhchhuah te hi tun session chhung atan bik a ni a, Thenkhatte erawh an chungchangah privileges committee tena an la chhuichian tur te an awm thung. Opposition MP te chuan Parliament aTanga hnawhchhuahah lungawilohna an lantir zui zel bawk.
Congress MP Jairam Ramesh chuan inthenfaina neih mek a ni a, tihian Bill-te chu sawihona mumal pawh awm lovin an pawm mai dawn a ni a ti a. MP hnawhchhuah vak vak a awmna chhan chu BJP MP te Parliament a buaina siamtute an luh theih nana pass petute hum nana tih a ni, a ti bawk a.
“Parliament building tharah NaMocracy chu a lal rawnna zawng zawng nen a inlailang” tiin Jairam Ramesh chuan a sawi.
Nimina Opposition member-te hnawhchhuah an nih hmain slogan aupuiin House Well-ah an kalkhawm bwk a. MP tam tak te chuan placard kengin Prime Minister Modi thlalak siam danglamte an keng a. Speaker chuan House a placard ken chu danin a remti lo a ti a.
“He House hi in ta a ni a. Kan vaiin House chhungah placard ken loh tur tiin thutlukna kan siam tawh a. Mahse, placard in lo keng lui leh a. Podium-ah pawh in lo lawn bawk a. In Thutnaah Thu rawh u, last warning ka pe che u a ni,” tiin Speaker chuan a sawi.
Parliamentary Affairs Minister Pralhad Joshi chuan MP tin ten new Parliament building hawn a nih lai khan Well a kal loh an remti vek a ni a ti a. Prime Minister thlalak siam danglam kengtu MP te lakah hremna a phut thu a sawi bawk a.
“Parliament building pahnih hi Speaker thuneihna a ni a. Speaker thupek kan zawm mai a ni. High-level inquiry neih mek a ni a. House hi mumal lo taka a kal an duh a, opposition te hi an insiam Tha tur a ni,” tiin a sawi.
Hetih lai hian NCP chief Sharad Pawar chuan December 19 khan Rajya Sabha Chairman Jagdeep Dhankhar chu Parliament security lapse chungchang chhui chian leh MP te hnawhchhuahah inrawlh turin a ngen a.
MP te hnawhchhuah chu thil dik a ni lo tiin principles of accountability and transparency kalh a ni a ti.