MP-in rel kawng siam mek tlawh

Lok Sabha MP Richard Vanlalhmangaiha chuan Bairabi atanga Sairang inkar rel kawng siam meka an thlen chin a hmunah Thawhlehni khan tlawhin hnathawh tawh leh hmabak awm a enfiah.
MP hi Hortoki Railway Station-a officer-ten an lo dawngsawng a. An hnathawh dan tlangpui leh harsatna awmte an lo thlen. MP chuan rel kawngin hma a sawn zia a taka hmuh chu lawmawm a tih thu sawiin, theihtawp an chhuah na zarah chak takin hma a sawn tih a sawi. An harsatna chu a tih theih ang chinah theihtawp chhuahpui a inhuam tih a sawi a ni.
Railway hotute sawi danin, hnathawktu turte hi Railway Recruitment Board (RRB) kaltlanga lak vek tur an ni a. Tualchhung mi lak theih tur chin awm ve mah se, hna sang a nih dawn loh avangin Mizo thalaiten exam an hmachhawn a pawimawh a ni. Tunah hian rel kal tir la ni lo mah se, Kawnpui Station thleng rel tlan thei tawh tura buatsaih fel a ni tawh a. Harsatna liantham a awm lo a nih chuan Sairang thleng hian July 2025-a zawh hman tum a ni.
Rel kawngin hmasawnna a thlen dan tur leh mipuiin an chhawr tangkai dan tur chu deputy chief engineer (Contruction) chuan a sawi a. Khualzin phur tana a tangkaina tur chu hriatsa ni mah se, chutiang thoa pawimawh, bungraw hlawm lian chi phurhna atan, thlai thar thawnchhuahna atan leh thlai thar chhe hma chi awlsam taka sawngbawlna hmun a thlenna atan a tangkai dawn tih a sawi a ni.