MP-in TNT hmun tlawh

Lok Sabha MP C Lalrosanga chuan Thawhlehni khan Aizawl Muanna Venga Thutak Nunpuitu Team (TNT) hmun a tlawh.
TNT hmunpuia nausen atanga puitling, kum upa thleng enkawl ngaite enkawl an nih dan leh an mamawh a hmunah hmuhpuiin, TNT-a rawngbawltute inpekna leh an hnathawh ropui a tih zia thawktute a hrilh a. Pathian rinchhan a, rinna tak tak nena mi 1800 lai harsatna leh mamawh chi hrang hrang nei an enkawl dan chu fakawm a tih thu a sawi.
TNT-a inenkawlna in leh hmunhma chu enkawl ngaite enkawlna atan a chep tawh hle tih a hmuhin a theih ang tawka tanpui a tum tih MP hian a sawi a. TNT Kalvari Hospital De Addiction Centre tihlen dan ngaihtuahpui a tum thu a sawi bawk.
TNT De addiction Centre tana MP Fund atanga lungrem a lo siamtir tawh chu enin tha a tih thu a sawi a. Kum 2016-a ama hoa din “Prayer for Myanmar” pawl hmingin TNT puala chhawmdawlna programme buatsaih an tum thu leh, kumin Krismas leh kumthar inkarah he hun hi buatsaih an tum thu a sawi a ni.