MP thlan hmaa political advertisement tih theih dan tur SLCC-in a tichhuak

State Level Certification Committee (SLCC) Media Cell nodal officer, addl. chief electoral officer Dr H Lianzela kaihhruaiin Nilaini khan Lok Sabha inthlanpui neih tur kaihhnawiha political advertisement pre-certification dilna lut ngaihtuahin an thukhawm.
Thutkhawmah hian political party pakhat atanga pre certification dilna lut endik a ni a. Election Commission of India-in dan leh hrai a zamte zawm a ni em tih endik niin, dan pela thil tih a awm loh avangin thurawn tlem siamin pawm a ni.
Electronic media kaltlanga political advertisement chhuah tur neite chuan ECI-in a din Media Certification and Monitoring Committee (MCMC) hnenah chhuah phalna (pre-certification) an dil hmasa zel tur a ni a. Electronic media hian social media pawh a huam tel. TV channel/ cable network, SMS/ voice message, cinema hall, radio & orivate FM channel, vantlang hmuna audio- visual display, internet leh social media website-a political advertisement tihchhuah turah pre-certification tih zel a ngai.
Hetih rual hian mimal account /blogs/ website/ social media platform hrang hranga thuchah, thlalak dah, comment, video adt. a politics kaihhnawih tarlan chu political advertisement-a chhiar tel a ni loa, party/ candidate-in an chhuah chhawn pawhin political advertisement-a chhiar a ni lo. Pre-certification pawh tih ngai loin model code of conduct bawhchhiatna erawh a awm tur a ni lo, tih a ni.
Candidate hming leh hamthatna tura advertisement siam reng rengah District Level MCMC hnenah chhuah phalna dil hmasak tur niin, state headquarters-a awm party leh pawl tan State Level MCMC ah dilna thlen tur a ni.
Candidate/ party-te tan chhuah hun tur thlen hma ni thumah dilna thehluh hman a ngai a, mimal/pawl tan erawh chhuah hun tur thlen hma ni 7-ah dilna thehluh hman a ngai thung.
Dilna hi ni hnih chhunga ngaihtuah zawh hman tur a ni a. Chanchinbu (print media) kaltlanga chhuah turte tan erawh vote thlak ni leh a hma chiah ni atan pre-certification tih tur a ni. Candidate remtihna a ni em, tih finfiah tur a ni a, a remtihna niloa chhuahtu (publisher) chu Section 171H of IPC hmanga hrem theih a ni.