MPF duh loh danin campaign luih luih!

Dampa bial by-election atan ngawrh takin political party-te an campaign a, tun Tum inthlanah hian inthlan dang ang lo takin MPF thawm a zawi hle.
Mizoram inthlan danga MPF-in ti lo tura political party-te a ngen Thin thilte kha tun Tumah hi chuan zalen takin an ti a, social media lamah pawh chung chu a lang.
By-election lo awm turah hian campaign tirh aTangin political party-te’n ruai an buatsaih nghal a, khaw hrang hrangah ruai an Theh sup sup.
Campaign-a kalte sawi danin, khaw hrang hrangah party tinin ruai hi an buatsaih a, party ngaiin ruai siam nawnna khua te, siam nawn fona te a awm a, party hrang hrangin a hrana an siam avangin khaw Thenkhatah chuan ruai an siam tluk tluk ti khawpin a sawi theih.
Chakma leh Tuikuk khuaah chuan tu party pawhin ruai buatsaih se, a khaw mipuiin an Theh zel mai a, Mizo khuaah chuan chutiang khawp chu a ni lo tih thu dawn a ni. Ruai han tihah pawh hian zanriah atana rin tur ruai pangngai bakah sawhchiar ruai a lar a, thingpui ruai pawh a lar.
“Vawk a tlu nasa a, ui pawh a tlu nual a, khaw tinah ruai hi chu a awm ang. Khaw Thenkhatah chuan ruai siam nawn a awm a, siam nawn awn awnna khua te pawh a awm,” campaigner pakhat chuan a ti.
House to house campaign pawh inthlan dang ang lo takin MPF aiawhte te lovin candidate-te leh campaigner-te’n mahni thuin an ti a, inven emaw inkalpui emaw a awm lo. Mahni duh hunah mahni duhnaah an leng a, zalen takin an leng kual thei. Aizawl aTanga campaign-a kalte tih ber pawh house to house campaign hi a ni tih thu dawn a ni.
Hla leh rimawi lamah pawh inkhuahkhirh a awm lo a, party hrang hrangin zalen takin mahni party hla an sain an ngaithla. Zaithiam pawh an ruai sup sup a, zaithiam larte an zai nasa.
Dampa bialah hian khaw 33 vel a awm a, Tuikuk leh Chakma hlang awmna khua hi paruk vel niin, Mizo khua, Tuikuk leh Chakma awmna a awm bawk. Khaw hrang hrangah hian MPF an awm a, tun Tum inthlanah hian street campaign-ah chuan MPF lamin a kaihhruai (chairman) hna an chang.
Dampa bialah hian inthlan boruak a nung a, bial pawn lam aTang pawhin ngaihven a hlawh. Party-te an campaign hma a, inthlan puan hmain theihtawp chhuahin an campaign tawh. A rei bakah an campaign dan enin senso a tam hle turah ngaih a ni.
Dampa bial hian November ni 11-ah vote an thlak dawn a, Chawlhni tlai dar 4-ah campaign theih hun a tawp ang. Tun karah khaw hrang hrangah party-te’n a hmawrbawkna hun an hmang a, Inrinni pawh hian khaw hrang hrangah a khar nan lian tham taka campaign an tum.