MPF-in Council of Churches thawhpui dan zawng dawn

On Nov 9, 2024 14 0

MPF-in Council of Churches
thawhpui dan zawng dawn
Mizorama rorelna dik leh fel a awm theihna atan leh inthlan ralmuang leh thianghlim a awm zel theihna atana hma latu Mizoram People Forum chuan Council of Churches in Mizoram thawhpui dan zawn an tum.
Mizoram People Forum (MPF) hian Ningani khan Aizawlah annual general conference vawi 17-na an hmang a. Hun khatna hi MPF president, Synod moderator Rev. Vanlalnghaka’n a kaihhruai. Secretary leh finance report ngaihthlak a ni a, vice president, Central YMA president Lalhmachhuana’n MPF hnathawh tawh leh hmalak zel tum dan a sawi.
Kum 2025- 2026 budget atan Rs. 14,18,000 pawm a ni a. MPF-ah hian Mizoram Presbyterian Kohhran, Catholic kohhran, Lairam Isua Kristan Baptist Kohhran, Evangelical Church of Maraland, Wesleyan Methodist, Independent Church of India bakah Central YMA, MHIP, MUP, Mara Thyutlia Py (MTP) leh Young Lai Association an tel a ni. Headquarter hnuaiah District Forum 8, Constituency Forum 25 leh Local Forum 475 an awm a ni.
Hmathlir zingah kohhran leh pawlah huang zauh zel tura hma lak, MPF hmalaknaah neutral zia lantir deuh deuh, vote thlaktu an pun zel theihna tura tan lak, electoral roll dik leh fel neih, Council of Churches in Mizoram nen thawhdunna zawn te a tel.
“A chhe lai siamthat” tih thupui hmangin MPF president hlui Rev. Lalzuithanga’n thu a sawi a. MPF hmalakna avangin inthlan boruak leh candidate ruat chungchang chu tha thawkhat viauin lang mah se, a lang lo lam chanchin erawh a la lungawithlak chuang lutuk lo nia a hriat thu a sawi. Sum leh pai hmanga vote zawn, inlei leh inhralh, engemaw thil intiam angte sawi a ni thin, tiin, “Heng thilah hian politician-te leh candidate-te ai mahin mipui lam hian kan tidik lo zawk nite pawhin sawi a ni thin,” a ti.
Hei hi siamthat a nih loh a, tun ang zela kan kal chuan tun aia nasa zawk harsatna – dan pawisak lohna, hlemhlet, tualthah, tharum thawh leh rethei leh hausa kar zau zel a thleng ang tih a hlauhawm thu sawiin, kohhran nun pawh a tha lo zawngin a nghawng zel thei dawn tih a sawi a ni.