MPF leh party thuthlung kan zawm tha hle – ZPM

ZPM party chuan Mizoram People Forum nen party-te thawhhona thuthlung an zawm tha hle tih an sawi.
ZPM office bearer’s thukhawm chuan resolution an siam a. Boruak muanawm tak hnuaiah tluang taka 2023 MLA inthlanpui neih zawh a ni ta chu an party chuan lawmawm a ti a. Inthlan tluang taka neih a nih theihna atana buaipuitute chungah lawmthu a sawi.
‘Mizoram People Forum nena kan thawhhona thuthlung kan zawm tha hle hi a lawmawm kan ti a. Hun lokal zel turah MPF leh party te thawhhona thuthlung changtlung zawk nen hma lak zel nise kan ti,’ a ti.
Election Commission of India (ECI) in vote chhiar hun atan Kristian-te ni pawimawh December 3 (Pathianni) a ruat chu ZPM chuan pawi a ti takzet tih sawiin, he hun ruat a nih thu ah hian ECI hnenah sawn tura ngenna ziakin tum hnih, an president Lalliansawta hminga thlen a lo ni tawh tih a sawi.
‘Mizoram Kohhran Hruaitu Committee, NGO Coordination Committee ten theihtawp chhuahin vote chhiar hun sawn a nih theih nan hma an la mek bawk a. NGO Coordination Committee hmalakna hi ZPM party chuan kan thlawp tlat a ni,’ a ti.
‘Kalphung thar, mipui sawrkar’ a pian ngei theihna atana theihtawp chhuahtu zawng zawng chungah ZPM Gen. Hqrs chuan lawmthu a sawi tih a sawi a. Zoram hmun hrang hranga an party mi leh sa bakah Zoram chhung leh pawn atanga ZPM thlawp a, an candidate-te tana theihtawp chhuahpuitute chungah lawmthu an sawi tih a sawi bawk.