MPSC hna lak chhui tur ruat Office hawngru ah MPSC puh
Mizoram sawrkar chuan State Public Service Commission hna lak dan chhuichiang tur a ruat a. Hnalak dan a diklo nia an hriat avanga Commission chairman bang tura phut mektu Mizo Zirlai Pawl chuan he hmalakna atana office an dah chu an tihtawp lailawk laiin, Thawhlehni tlaia office hawn ruk nia an hriat vangin an pungkhawm.Mizoram Public Service Commission (MPSC) in tunhnaia hna a lak danah thil fel tawk lo a awm nia hriaa MZP-in hma a lak meknaah MPSC chairman bang turin an phut a, an phutna tihhlawhtlin a nih loh avangin April 15 atang khan chairman bakah MPSC thawktute pisa kai tur an dang.
April 16 khan pisa kai tur dan hi MZP hian a chhunzawm a. Pisa kai luih tum an awm loa, boruak muanawm tak hnuaiah hun an hmang tih MZP hruaitute chuan sawiin, chawhnu dar 2.00 khan pisa kai tum dan hi an titawp lailawk tih an sawi a ni.
Hetihlai hian Mizoram sawrkar Vigilance department chuan MPSC hna lak dana thil fel lo awm nia sawi chungchang chhuichiang a, sawrkara report thehlut tur, inquiry officer atan Mizoram chief secretary hlui leh MPSC chairman hlui M Lalmanzuala, IAS (Rtd) chu April 15 khan a ruat a. A chhui tan atanga ni 7 chhunga report pe tura tih a ni.
Hemi chungchang hi chief minister Lalduhoma chuan April 15 zan khan MP inthlan campaign-a Khawzawla a awm laia sawiin, tunhnaia MPSC-in MCS combined exam a kalpui dan leh forest officer lak danah thil fel lo awm nia zirlai pawlin a hnena an thlen chu chhuichian a ni dawn tih a sawi a ni.
MZP thuchhuak chuan inquiry officer hi an ringtawk a, ngun takin a hmalak dan a ngaichang dawn tih sawiin, zalen taka hna a thawh theih nan leh chak zawka hna a thawh theih nan MZP chuan MPSC office kawta punkhawm chu chhunzawm rih loh nise, an ti a. Chhuichian chhung chuan MPSC office chu tumah hna thawk loa khar turin thuneitute an ngen tih a sawi a ni.
MZP tin darh hnu, Thawhlehni tlai khan MPSC staff thenkhat chu office an kai lui niin MZP hian an sawi a. MPSC Controller of Examination (COE) chuan a staff-te office kal tura koin, office a hawntir tih an sawi a. Hei hian an rinhlelhna a tizual hle tih an sawi a ni.