MPSC Hna Lak Dan Hi

Sawrkar thar a rawn piang a, MSSSB hiahna tur thuchhuah 8th February 2024 khan tichhuakin, Group B hna lak chu MPSC kutah a awm leh ta a. MSSSB hiah a nih khan MPSC hi thuam chak leh hna lak kawnga induhsakna awm lo tura sawi a ni.
Group A & B hna latu atana MPSC hman hi a hat lohna a awm hran lo, mahse exam result nghah hun chhung rei hin lutuk erawh hi chu hna zawng lai tan harsatna a thlen avangin duh khawp loh lai leh kalphung samkhai deuh zawk awm theih dan tura ngaih tlem azawng tarlan kan duh a ni.
Tun hnai Group B(Non-Gazetted) hna lak hi ngaihtuah ta ila, nikum December Combined Group B Exam (Assistant,UDC,adt) result hi tun thla(May) thlengin written result a la chhuak lova, JAO result January(2025) ami pawh a la chhuak thei rih lo. Tun thla hian SI (Supplies) & Receptionist leh UDC exam buatsaih ni lehin hei pawh hi written result nghah leh fat a ngaih hmel. UDC (December, 2024) a tling turte kha tun kum UDC (May, 2025) result chhuak se an tling leh nual bawk anga, hna lak hmasak result chhuak hman si lova hna lak inthuah hnem lutuk hi a fuh lo deuh awm e. Nikum Prelims June thlaa buatsaih pawh tun kum April thla tawpah tling thar te kan hriat theih chauh avang te hian MPSC hi an zawh loh nghâwngkawl kan bahtir em ni?
Group B (Non-Gazetted) result chhuah chak hleih theih lohna chhan hi hna diltu sang tel te conventional type questions (Essay adt.) endik hi a ni thei ang em? UDC (December, 2024) exam-ah khan hna diltu 14517 awmin, a zatve pawn exam se, paper sang tel endik hi thil namai a ni lo.
Hna lak chhung rei loh zawk nan exam buatsaih dan hi her danglam hret ta ila, entirnan Qualifying Paper leh OMR hman angkai zual lam te hi. Nikum September thlaa AAAO & AAO Exam kha OMR veka zawhna siam niin, November thla tirah written result a chhuak hman daih. Prelims Paper – II (CSAT) entawn hian Arithmetic & Reasoning te hi Group B(Non-Gazetted)-ah hian Qualifying Paper atan hmang ta ila, qualifying paper paltlang te chauh paper dang chhanna kan endik sak chuan hun leh tha sen a tlem phah ngei ang.
Group B(Non- Gazetted) exam-ah hian syllabus pahnih hman niin –
1) Assistant & UDC syllabus: Assistant & UDC Syllabus Paper – I hi GK leh English (darkar 3) niin, Paper – II hi Basic Computer Knowledge, Arithmetic & Reasoning (darkar 3) te an ni. Computer Certificate hi hna dil nan kan phût tho a, chuvangin office work an thiam dawn tih lanna computer certificate ber an neih tho chuan Computer Knowledge zawhnate hi a ngai tehchiam pawn a lang lem lo. Tin, Essay pawh hi Group B syllabus pakhat zawkah an telh chuang lo hian thil chuangtlai a nihtir deuhin a lang.
2) General Competitive Examination syllabus: Paper – I (General English) hi OMR leh ziaka chhan ngai (Letter writing, precis, adt.) hi darkar 3 hun chhung pek niin, Qualifying Paper awm se chu endik a hautak lo phah sawt ang.
Paper – II (GK, Arithmetic & Reasoning) hi darkar 2 chhunga chhan ngai a ni ve thunga. UDC syllabus Paper – II (Arithmetic & Reasoning, Computer Knowledge) hi zawhna 100 darkar 3 chhunga chhan tur a nih laiin General Competitive Examination Paper – II ( GK, Arithmetic & Reasoning) zawhna 100 darkar 2 chhunga chhan tur a nih avangin candidate tan a rei lo bik hle awm e.
Mihring pung chho zelah sawrkar hna erawh a pung thur thur ve si lova, chuvangin Mizoram sawrkar hna lakah Mizorama chengte ngei duhsak thei zawnga Recruitment Rules ha leh khauh zawk duan hi a ul ta viau. Assam paw’n an state sawrkar hna lakah a ram mi ngei te tan chauh a tih ang hian Mizoram mite tan chauh tih ve a hun tawh.
Hna lak rang si, fel fai tho bawk si, hna diltu tana ha bawk si, nei thei tur chuan MPSC hian Recruitment Rules leh Syllabus ha zawk a neih a ngai. Tichuan, sawrkar pisa hnathawk indaih lohna avanga hna lakte hi a chak phah s