MPSC-in MZP an hrilhfiah

MPSC-in MZP an hrilhfiah
Mizoram Public Service Commission (MPSC) in tunhnaia Health & Family Welfare department hnuaia entomologist hna a lak danah MPSC-a thawktute leh Mizo Zirlai Pawl (MZP) Gen. Hqrs. hruaitute an inkawm a. MPSC secretary Dr H.Lianzela hoin MPSC official 6 an tel a, MZP aiawhin an president H Lalthianghlima hoin OB 4 leh adviser-te an tel.
2024 December 12-a MZP thuchhuaha tarlan, “MPSC-in entomologist hna a lak dan leh veterinary asst. surgeon hna a lak dan hi chhuichiang a, a tul anga hma la turin Mizoram sawrkar kan ngen a. 2024 December 20 ralhmaa hmalakna a awm lo a nih chuan, hmalak zel dan tur kan ngaihtuah dawn,” tih chu ngaihtuah hoa inkawm an ni.
MPSC hotute sawi danin, boruak tha tak hnuaiah an inkawm a, MZP lamin an thil hriat duh leh hriatchian loh an neih hrang hrang leh dikhlel nia an ngaih laite thil awmzia inhrilhfiah a ni. MPSC leh MZP hian hun lokal zel turah thawhhona tha tak nen inpawh taka hma lak ho zel tha an ti a, MPSC zahawmna humhim a nih zel theihnan leh tha taka a kal theihnan thawhdun zel nise an ti.
MPSC sawmna ngaipawimawha inkawmkhawmnaa MZP an tel theih avangin MPSC chuan lawmawm a tih thu a sawi a. MPSC hnathawhna kawngah hriatchian duh an neihte zawtfiah a, a tul ang zela thurawn pe a, finchhuah thin turin Commission chuan MZP a ngen tih a sawi a ni.