MRB hotu in larsap hmu

Mizoram Rural Bank chairman thar Sheryl L Vanchhong chuan Nilaini khan larsap Dr Hari Babu Kambhampati chu Raj Bhavan-ah a hmu a. Mipuiin awlsam leh tangkai zawka bank an hman theih dan tur leh bank branch la awmlohna hmuna banking service pek theih dan turte an sawidun.
Mizoram Rural Bank chu Mizorama bank inzar pharh zau ber a nih avangin kawng hrang hranga midangte tana awlsamna thlen thintu a ni tih larsap hian a sawi a. Nitina eichawp zawng leh khawsak harsa zawkte dinhmun khaichhuah a nih theihna tura sawrkar laipuiin ruahmanna a siamte nasa zawka tihhlawhtlin a pawimawh thu leh chu’ngte chu sawrkar department hrang hrang leh bank tangdunin tihhlawhtling thei se a duh thu a sawi a ni.
MRB chairman hian an hmalak mekna leh an thlen chin a hrilh a. Sawrkar laipuiin a ngaihpawimawh em em PMJDY account chu an branch zawng zawngin an hawnsak theih thu te, khawl hmang uar tura inzirtirna (digitization initiative) ah pawh a thawhhlawk ber bank an nih thu te, mipui mamawh phuhru zel tura an bank an inhawn thute a sawi. Larsap rawtna siam pawh a remchan ang zela tihhlawhtlin an tum tur thu a sawi bawk.