MSB thawktute dan tum A tih tur a ti tawk lo – MZP

Scholarship pek tur la pek zawh loh te pek phutin Mizo Zirlai Pawl huaihawtin Nilaini khan Mizoram Scholarship Board office kawtah a ni hnihna atan an pungkhawm a. Vawiinah chuan MSB thawktute pisa kai tur dan an tum. MZP hian MSB-in a tih tur a tih loh vanga he thil hi thleng nia an ngaih thu an sawi.
MZP president H Lalthianghlima chuan Scholarship Board-in a tih tur a tih tawk loh avangin tun dinmun hi thleng an ni tih a sawi a. “Screening Committee vawi li an thut hnu ah, a vawi li-naah chauh scholarship chungchang ngaihtuah a ni hi scholarship hotute inthlahdah vangah kan ngai,” a ti.
Mizoram sawrkarin scholarship second installment tur sum a dawn tawh hnu ah rei tak bawhzui loha awm chu MSB secretary leh under secretary-ten an tih tur an ti tawk lo nia a hriat thu sawiin, “Scholarship sum hi September 25 khan Mizoram sum bawmah a lut a, November 3 thleng hun kan pe a, November 3 hma zawng khan scholarship file hi a che lo reng reng a, a awm tawp mai a ni,” a ti.
Zirlaite chanvo rahbeha awm mek sualchhuak tura pungkhawm an ni tih MZP president hian sawiin, “Hetiang buaina hi nakumah a awm leh a nih chuan MSB hi luhchhuah a ngai a nih chuan kan luhchhuah tawh ang,” a ti.
MZP hruaitute hian Nilaini khan chief secretary Dr Renu Sharma chu a pisa-ah hmuin zirlaite harsatna leh scholarship pekchhuah thuai a tul thu an sawipui a. Thawhlehni chawhnu khan MZP hian Mizoram joint chief electoral officer hmuin zirlaite scholarship pekchhuah thuai a tul thu an lo sawipui tawh a, chief election commissioner hnenah zirlaite scholarship pek chhuah phalna pe thuai turin ngenna lehkha mail kaltlangin a thawn a ni.
Tarlan tawh angin, zirlaite scholarship second installment tang zat hi cheng nuai 1787.48 a ni a, heng sum hi Mizoram sawrkar kutah 2023 September 25 khan a lut tawh a ni. Scholarship second installment pawisa la dawnglo zirlai 19495 an awm a, Mizoram chhunga zirna in 36 atangin zirlai 5023 bakah pawl XI leh XII zirlai 11462 leh Mizoram pawna awm zirlai 3010-in an la dawng lo a ni.
Scholarship sum pekchhuah phuta punkhawm hi vawiin – November 16-ah pawh chhunzawm tur niin, MZP leh zirlai pawl hrang hrang aiawhte inhmukhawmin a rel angin MSB office-a thawktute kal tur dan tum a ni.