MSL 11 Finals: Khatla TBL vs Zemabawk BC
MSL 11 Finals:
Khatla TBL vs Zemabawk BC
Mizoram Super League (MSL) 11 finals chu zanin dar 8 hian a inherchhuak dawn ta. Thlirletna leh thlirlawkna lam kan hrut hma in Khatla TBL tobul leh a chhehvel chanchin ngaihnawm zet hmangin bul in han tan dawn ang hmiang. Zemabawk BC chanchin chhehvel erawh niminah kan hrut tawh kha.
Khatla TBL
He club hi kan sawi dawn chuan chanchin lunglenthlak leh lungkuai zet, Pu R. Malsawmtluangan (Pu Tluangtea) a fapa R. Vanlalvena (Vena) te thianho Khatala Sporting Club a khel thinten tih tak meuha an khel a hmuh khan rualawhna neiin he Khatla TBL Club hi a din – pa in fapa a hmangaihna atanga he club hi indin a ni.
Tichuan, MSL chanchina ngaihnawm ber lai pakhat Season 5 tih loh kha chuan hei finals an la lut vek a nih mek hi.
Khatla TBL board chairman hmasa ber Pu Tluangtea boral hnuah a fapa Vena hi board chairman ni chho ve lehin, managemnet board changtlung tak Pu Michael-a te thutpuina hnuaiah he club hian a la nei ngar ngar hi an insawhnghehna bulpui pakhat a ni .
Tuna kan sports minister ni mek Pu Tetea Hmar hian Pu Tluangtea hlutna hi a hmu chiang ngang a, Hnih Thum tih lehkhabu ah chuan heti hian a lo thlah a. “….hetiang mi hi Mizoramin a ngah lo, mi dangte tana insen inhuam kan chan ta hi a uiawm takzet a ni” tiin.
Hmui chauh hmanga ram leh hnam inhmangaih siak awm ta se, ani Pu Tluangtea kha chu a tel ngai lo – thil tih leh sumin a luangchhuak a, chu chu a fa u ber Vena hian a rawn chhunzawm ta chat a nih hi! Khatla TBL chanchin hi chhungkaw chanchin a ni tel a, infiamna huangah a rawn inzarpharh a ni. MSL vawi 3 champion an ni tawh bawk kha aw.
Fans fuankhawm zan
Club thlawptu mai ni lo, Mizoram baksketball inkhawmpui lian ber palai thlen kim zan hian kil tin atangin R. Dengthuama Indoor Stadium an pan khawm ruih ruih ang a, hai theih miah lovin Khatla TBL leh Zemabawk BC fans i hmu leh dawn bawk a nia – hei hi MSL finals boruak khamawm loh pui tak chu a ni.
Khaikhin loh theih lohin fans ngah zawk i buk ang a, tan lam leh awn lam i neih chuan a tam zawk i thlirna a fim tawk lo maithei; mahse, neutral lam tan inkhel hma hawt atanga fans ngah zawk han khaikhin hrim hrim hi a nuam dawn.
Heti hian sawi ila, MSL 11 a fans ngah ber ni mek ZBBC leh MSL history a fans nei tam ber te zinga ni chho ngar ngar Khatla TBL inkhelh zan a ni a – kal hma a finthlak ang.
Club pahnihte players buk ila
Khatla TBL hnam dang player 3 te hi an tualchhung star player champion-pui char char theih khawpa theihna nei sang pahnih Emmanuel-a leh Thazuala te anga rang leh tlan chak an ni lo, an khawngin an khauh thung em em lawi si!
Zemabawk BC lam hnam dang player 3 te hi awm hmuna khup tha lo che tuah tuah ang chi an ni der lo va, an tal pit rangin an tuan a tha hle – an kiangah an tualchhung star player pahnih Ropuia leh Thianga chu sawi zui ngai lo khawpin i hriat kha.
Kan tarlan tak loh zingah hian club pahnih te player pawimawh tur pathum thurchhuak teh ang.
Khatla TBL lam tan hian Lsa, Hlutea leh Stephen-a hi an innghah lehna tur a ni. Zemabawk BC tan hian a phu tawk fakna dawng ngai lo Tyson-a, Lma leh an captain fing Rinawma an hnukpui an ni leh dawn.
An MSL 11 zin kawng
1st match – Khatla TBL hian League Round lamah hetiang hi result an nei:
1. 1st Match TBL 62 – 73 Saron BC
2. 2nd match – CV 52 – 69 TBL
3. 3rd match – ZBBC 79 – 96 TBL
4. 4. 4th match – TBL 69 – 64 BCA
5. 5th match – TKS 68 – 102 TBL
6. 6th match – TBL 74 – 60 CBBC
7. 7th match – MSV 78 – 89 TBL
Semi Finals:
1. Game 1 – TBL 82 – 66 Hotshots
2. Game 2 – Hotshots 49 – 73 TBL
Zemabawk BC hian League Round lamah hetiang hi result an nei:
1. 1. 1st Match BCA 73 – 64 ZBBC
2. 2nd match – MSV 84 – 78 ZBBC
3. 3rd match – ZBBC 79 – 96 TBL
4. 4th match – ZBBC 86 – 77 Saron
5. 5th match – CBBC 61 – 91 ZBBC
6. 6th match – TKS 80 – 88 ZBBC
7. 7th match – CVBC 73 – 99 ZBBC
Semi Finals:
1. Game 1 – BCA 74 – 81 ZBBC
2. Game 2 – ZBBC 63 – 83 BCA
3. Game 3 – BCA 70 – 72 ZBBC
Hoops Mania Timeout
Khatla TBL Asst Coach Richard-a chuan, “kan inbuatsaihna a tha hle a, kan head coach in min ho tha bawk a, champion ngei kan tum. A hmun ngeia min rawn tawiawm theuh turin fans ka sawm a che u” tiin sawmna a zep tel.
Zemabawk BC puipa te zinga mi Ruatmawia chuan, “IG lamah min tantu tunhnaiah an pung nasa hle a, thinlung takin vengchhung leh veng pawn lama min thlawptute lakah lawmthu ka sawi a, zanin hian a hmunah min rawn tawiawm leh vek turin ka sawm a che u” tiin The Aizawl Post Hoops Mania zawhna a chhang.
MSL chanchin keu let ila, zanin thleng hian club panga Zarkawt BCA, Khatla TBL, Mission Veng Vikings, Tuikual South leh Zemabawk chiahin MSL finals hi an la luh theih thu MBBA General Secretary Pu Zomuanpuia hnen atangin thu kan dawng bawk.