MSL 11 – Z for Zarkawt BCA or Zemabawk BC? Inkhel ticket zawh hma zan!

Mizoram Super League (MSL) 11 hmawrbawkna lam a inherchhuak chho tan a, zanin dar 8:30 hian semi finals hnuhnung zawkah Zarkawt BCA lal ram (kingdom) ah tun MSL season 11 a fans nei tha lawrlak Zemabawk BC an lut dawn – game 3 khelh tura ruahmanah hian vawi hnih chak hmasa zawkin MSL 11 finals an lut ang.
Zarkawt BCA

MSL tum ruk teh meuh mai lo champion tawh hian semi finals thleng turin paltlang team pasarih an nei a, an dinhmun thlir teh ang u.

1st match – BCA 73 – 64 ZBBC
2nd match – BCA 104 – 79 CBBC
3rd match – BCA 81 – 65 Saron
4th match – TBL 69 – 64 BCA
5th match – CVBC 70 – 87 BCA
6th match – MSV 72 – 89 BCA
7th match – BCA 104 -74 TKS

Zarkawt BCA hi mimal thatnaa innghat an ni ngai em? Ni lo, team anga inphochhuak hlawhtling thin an ni.
Vawi 6 an champion theihna tura an head coach pahnih te tel lovin, tuna an head coach ngawichawi zet, Zarkawt BCA mil ze zawi nei K-a ho hian semi finals hei an lut leh ta pang!
An tualchhung super star pathum: Captain the gentle giant Matthew Sailo, Sub Zero Zonuna leh Cool Rider R-a te hian team an suihkhawm tha hle a; khelh chhiat nei ngai meuh lo Hmachhuana kut a hmui leh ta tiu teu hle bawk.
An tualchhung player Sangsanga, B-a, Nghaktea, Faka leh an hnam dang player-te hi Zarkawt BCA jersey pawl an hâk hnu hian basketball court pawn lamah i hmu sek lovang – thumal pakhat ‘rare’ tih hi nghet taka Zarkawt BCA nena insuihzawm, an hman tangkai a ni.
He club hi Zarkawt veng ta bil a ni lo, mipuite ta a nih angin an inkhel en turin hmun hrang hrang atangin an rawn fuankhawm leh ang – MSL hi chu Zarkawt BCA ta ni tlat hek, history keu let teh.
Zemabawk BC

SL ah hian mikhual tlangnel an awm ngai a nih chuan season hnih a zawna MSL semi finalist ZBBC hi an ni!
MSL ah hian pem thar inthlahrung zet ni mai lovin, undivided Zemabawk mipui thahrui leh tawiawmna nen Aizawl daia veng pakhat satliah an nih loh zia MSL X atanga lantirin, hei Mizoram basketball hmel hmang an thlak chhunzawm zel – fans nena thawkchhuak tha ber club an ni mek.
7 star hotel-a khualchhawntu zei zet iangin an club puipaten hmathlir an neih an rap chho chat chat zel a, Zemabawk pawn lamah thlawptu an neih belh zel a, an chakna supporter-te zanin hian an tlem ring suh – khuang te leh lamin an ri leh hulh hulh dawn sa.
The special duo Ropuia leh Thianga, Lma kut leh 3 points, Tyson-a hming leh defense, player paukhauh Michael-a te kiangah tisa damna chhar thar mingo Carl leh officer pahnih Pratyanshu bakah Sashank te hian history thar chhawpchhuah an tum – Khatla TBL leh Zarkawt BCA finals dal leh dan chah an tum bur!
MSL 11 a an zin kawng hi thlir zui ve teh ang:

1st match – BCA 73 – 64 ZBBC
2nd match – MSV 84 – 78 ZBBC
3rd match – ZBBC 79 – 96 TBL
4th match – ZBBC 86 – 77 Saron
5th match – CBBC 61 – 91ZBBC
6th match – TKS 80 – 88 ZBBC
7th match – CVBC 73 – 99 ZBBC

Hoops Mania Timeout
Zanina inkhel turte hi league round lamah an lo insu tawh a, Zarkawt BCA te hi point 9 in an chak. Hei hi league round match hmasa berah a ni nghe nghe a, ZBBC 64 – 73 BCA!
Coach pahnih Sangpuia (ZBBC) K-a (BCA) hi hi head coach anga an tawnhriat inthlau deuh mah se, team insawhnghet zawk nge hmathlir nei tha chak zawk ang tih bukin a awm dawn.
Relegation Battle
Tlai lam dar 5:30 hian Saron BC leh Chhinga Veng BC ten relegation match, game 2 an khel leh dawn. Game 1-ah Saron BC hian Chhinga Veng BC hi 80 -79 in an hneh hram!
Aizawl East II derby match hi a pawimawh zual ta, a hmuna tawiawmtu nei tha zawk tan hamthatna a tam ang.