MSL 11 – Zemabawk BC a tho ta! Zarkawt BCA ngamtu Zemabawk BC

MSL 11 – Zemabawk BC a tho ta!
Zarkawt BCA ngamtu Zemabawk BC
March ni 4, 2026 inrinni zan khan Mizoram Super League (MSL) 11 semi finals game 3 R. Dengthuama Indoor Stadium Salem Vengah khelh a ni a, he inelnaa match hmasa an khelh pathuma chak lo leh semi finals game 2 a tlu nawn leh sak ZBBC chuan game 3 ah erawh Zarkawt BCA 72-70 a hnehin, ZBBC a tho ta! An club history ah a tumkhat nan MSL finals an inhlang kai e.
Aizawl daia veng satliah an ni tlat lo!
Kum 1889 daih kan keu let chuan Zemabawk hming lo chhuah dan hi a hai let theih. Thangthawizema Hrangkawl hi Sailo lal in upa ah a ruat a, ani hian Bawk a khawh thin a, chuta tanga he khua/veng Zema Bawk hming hi rawn pu chho – he lam hi chu kalsan phawt ang.
Zemabawk atang hian Thuampui leh Falkland an indang tawh a; tunah hian Local Council pali leh Branch YMA pali a ding mek – heng ho zawng zawng hian intawm an nei leh then hran loha lungsi taka an pen chhuah theihna chhan, ‘The Undivided Zemabawk’ anga MSL X leh 11 a an rawn inlan theihna chhan chu i hriat angin Zemabawk BC ngei hi an ni e.
Kum 10 liam ta, kum 2016 khan tuna ZBBC club owner Pu Ricky Lalhmingsanga leh a thiante Lalruatpuia leh Malsawmtluanga (Aba) te chuan ngaihtuahna thui tak neiin he mipuite club tan rawn Zemabawk Basketball Club hi an din rawih a, Aizawl District Basketball Association-ah inziak lutin Division 3 ah an club hming hi a chuang vang a ni.
Tumkhat chu he club puipate hian MSL inkhel an en a, nasa lehzual zawka an chenna veng Zemabawk hming langkalha he intihsiakna ah hian tel ve theih dan an dap a, vawiin hi an thleng ta der.
Thapui nen theihtawpa tan la in, heng a hnuaia tarlan te hi an hniak lo hnutchhiah tawh zinga hrawl zual te an ni:
1. 2nd place (MBBA Inter Dist. Championship) – 2022
2. 2nd place (Division 2) – 2023
3. Champion (D League) – 2024
4. Semi Finalist (MSL X) – 2025

Semi Finals Game 3 chu
Match official hmui atanga hamrik a rik tan phat atanga a tawp thlengin team pahnihte an innawr tawn zak zak a, tum 10 zet point an in nih rual hial nia!
Zarkawt BCA captain Matthew Sailo (11 pts/9 rebounds) khan 37 minutes zet a khel a, R-a (11 pts) leh Zonuna (8 pts/ 7 assist) pawhin minute 36 teh meuh mai an khel cheu. Nazi (19 pts) leh Arvinder (13 pts) te an khel tha thawkhat hle bawk.
Lalrina Renthlei tel lohna MSL 11 zetah chuan Zarkawt BCA hian he Tuikhuahtlang pa hi an mamawh zia a lang, hun khirhkhanah ‘Rintlak Rina Renthlei’ khel lo pawi ti fans thawm hriat tur a ri ring hle.
Zemabawk BC lam tan Lalropuia (19 pts/7 rebounds) chuan pressure sang tak hnuaiah player tha fal nalh a nih zia lantirin minute 37 chuang akhel a, MVP a phu zia lantirin a tum thum nan player of the match a hlawh chhuak bawk. Hun pawimawha vawi 5 zet mai steal a nei kha a pui teh e.
P. Tomar (16 pts) leh Shashank (12 pts) te inkhel kha vawi tam ennawm tham khawp a ni. Hliamin a bawh buai a hriat deuh Thianga (9 pts). Heng karah hian player court pawn lama inthlahrung zet Tyson-a defence mawlh te, Lma taimakna leh ZBBC Captain Rinawman a hnam dang teammate-te boruak so hulh hulh a a thunun hneh zia mawlh te kha pui tak a ni.
Hoops Mania Timeout
Fans heti tak maia ZBBC in an ngah chungchangah hian TheAizawl Post Hoops Mania hnenah ZBBC secretary Rochansanga (Rca) chuan, “Zemabawk Basketball Club chuan Pathian leh veng chhung mipuite thlawpna vang liau liauin a vawikhat nan Mizoram Super League finals kan chuang kai ve ta reng mai a, finals kan khelh hunah pawh minlo tawiawm zel turin kan sawm a che u” tiin a sawmna a siam a, bus thawh ṭhintute – Zemabawk LC, Pu Vanlalneia leh Pu Zochhuana te chungah lawmthu a sawi bawk.
Heng bakah hian ZBBC chuan an supporter- te ei leh in tum sak thin tu SKY Fitness Gym neitu te chungah lawmthu an sawi bawk e.

Finals khelh hun tur

Game 1 : Ni 07.04.2026
(Thawhlehni zan)
Game 2 : Ni 09.04.2026
(Ningani zan)
Game 3 : Ni 11.04.2026
(Inrinni zan/If necessary)