MSL Final: Khatla TBL vs Zarkawt BCA |pa Bunghai

MSL Season 9 chu mi tam tak rin lawk ang ngeiin champion trophy la hnem ber BCA (4) leh anmahni hnaih bertu TBL (3) bawkin a hmawr bawktu tur nih an inchuh leh dawn ta.
Final hi best of three series tur a ni a, March ni 11, 13 leh 15 (Monday, Wednesday, Friday) zan dar 8-a khelh tura duan a ni; Zonet lamin live telecast-in an tichhuak leh dawn a, tin, ticket hi R. Dengthuama Hall-ah lei theihin MBBA lamin an zuar chhuak leh bawk ang.
MSL chanchina champion trophy la hnem ber leh record nei tha fal nalh he club pahnih hian Season 10 zawh ruala MSL club hlawhtling ber nih hi an tum dawn chiang, he an thil tum hi inchhut chah sak tawn an tum tur leh an inbeilet tur lai tak hi hmuhnawm leh mit titlaitu tur a ni.
Khatla TBL Bihchianna
Mission veng tlangval leh an thluak bur, head coach Ahruaia hian, “Tunhnaia tournament lian – 2024 Season Opening leh MBBA Cup lamah Zarkawt BCA hi final-ah hnehin champion zui mah ila, tun tum MSL league round-ah khan kan hneh lo thung!
“Kan inbuatsaihna angin kan la khel chhuak zo lo a, Bungkawn LB lakah erawh semi-final-ah kan rawn tho chhuak leh thei kha ka lawm takzet. Chhun lamah darkar hnih shooting practice bik neiin, zan lamah drills, offense leh defense bakah tul dangte kan practice zui thin. BCA nen hi chuan vanneih leh vanduai inkar tak tak a ni a, theihtawp kan chhuah a ni ang chu,” tiin inkhel pawimawh a thlirlawk.
Indian Sr. Mens Team boruak pawh lo hap pha ve ngat, an captain |hazuala hi a khelh that tum a nih phawt chuan champion-pui tham khawpa talent nei tha a ni a; Thianga thahrui fei tak leh Big Mike-a an inthlawp fuh vaih chuan supporter kut beng thawm leh rawl chhuah ri a ring leh ngawt ang!
Lsa kut a mawm a, hmeichhe tan rawn Eddie-a mid range shooting a luh leh thaih thaih chuan R. Dengthuama Hall chhung boruak a ‘hot’ leh dawn sa!
TBL hian an supporter-te huikhawm an thiam a, naupang exam chawlh lai hian ennawm ruai ropui chhawpchhuahna hmun hi an chhimpui loh ring suh – TBL best supporter ‘lam thai’ che vel chhehvel mipui tinui dar dartu kha chibai leh sak ang aw.
Sawi hmaih thiang lo, mikhual tlangnel Keyes hian eng club tanfung leh an kawngkapui kalhna pawh a chhu hawng thei – hei tak hi final tiphurawmtu tur a ni!
Zarkawt BCA Bihchianna
An head coach, tawnhriat ngah zet Marc Tetea Sailo hi a foreign player pawimawh tak mai, Malou-a hian a lu a ti hai ngei ang; ani hi an chhungkaw thil avangin an chhawr thei dawn lo a, Mizo player hlangin final best of three series hi an hmachhawn a tul thut ang em?
Marc Tetea hian tunhnaia MBBA Cup leh Season Opening-ahte khan a Mizo player rualte hi final a chuankaipui ve ve a – ani hi USA lama basketball kal hmang thui tak lo zuk belchiang tawh a, Mizoram Sub Jr. team-te India ram pumhuap inelna lama a zawna tum thum champion-pui (3-peat) tawhin, basketball zirna (academy) buaipuiin naupang 60 bawr vel a kilkawi mek.
“Vanduaithlaktakin, kan foreign player-in mimal chungchangah harsatna a tawh avangin tunhnaia tum hnih finalist ni thei, Mizo player hlanga kan khelh a tul thut thei – anni hi ka ring tawk hle a, hun khirhkhan berah pawh kan nguai mai bik lovang!
Club owner atangin thlawpna kan dawng tha a, kan club min tantu zawng zawngte’n final match hi a hmun ngeiah min rawn tawiawm turin ka sawm a che u!” tih hi BCA coach kamchhuak a ni.
BCA captain, USA lama tawhkhirh zawk player tha rual lo zuk hmachhawn tawh, Matthew Sailo (the gentle giant) hi a puitling ta; R-a season kal ta khan a reh hle nang a, amah tak tak tun season zet chu kan hmu ta!
Ramthar veng tlangval Zonuna hi an elpuite’n a rilru fim tihnut hi BCA game chhiatna hnar tih an hria – tun season erawh Zonuna hi chawhbuai phak a ni lo!
Lalrina Renthlei a la awm cheu! Mizo player zinga tha ber inhnialna hi MSL trophy hmanga a thaibo hun a thleng ang em?
Zarkawt tlangval Kima hi game muthlu kaitho thei khawpa team boruak chawk danglam thei a ni a; rawlthar Sangsanga leh veteran Durtlang Faka bakah thaza zawk player rualte’n bench luahlum an tum satliah dawn lo – en a va chakawm ve le!