Zonuna leh star rual zan!
-- Advertisement --
Sharda Mizoram University Mizoram Super League X ruangam a hriat ta a, hahchawlh leh thawk lak zan, hun hlimawm leh zangkhai – All star zan April ni 5, 2025 Zirtawpni zan khan R. Dengthuama Indoor Stadium-ah neih a ni a; he hunah hian 3 pts shooting leh slam dunk hmanga inelna buatsaih a ni.
Tunhnai 3 pts shooting contest neihah a tum thum nan Zarkawt BCA fachuam, Ramthar tlangval Zonuna chuan 3 pts shooter tha ber lawmman a hum haw a; MSL X a hnam dang player inlan zinga ṭha ber ni hiala mi tam tak ngaih, Khatla TBL player James chuan basketball ngaina te hlut leh hmuhnawm tih zet Slam Dunk intihsiakah lawmman pakhatna a la ve thung.
He All Star game-ah hian Runmawi Team leh Online Mizoram Team te an rawn pen chhuak a, inelna tang tak ang ni lovin hmuhnawm chhawpchhuahna a ni a, he inkhelah hian thiam leh theih thil hlu bik, mipuiin ding chung hiala zahna an lantir a awm a, Online Mizoram team star, Champhai BC player ni bawk, Ropuia’n a dunk chu kut bengin hluah hluahin an lawm a ni.
Ropuia’n ropui taka tunge a nih a phochhuah tum hian mi tam takin Mizote tan tih ve theih loha an ngaih ‘dunk’ chu Lalrina Renthlei, Big Mike leh Matthew Sailote’n thil naranah chantirin, an dunk suau suau!
Shooter tha bik te chanpual, center atanga shoot luh nalh hi thil har leh thil tih theih loh hiala ngaih ni mah se first half tawp dawn second 30 vel lekah Runmawi star player, MSL X a Saron BC tana khel tha lawrlak Tea ngei maiin awlsam takin a shoot lut thaih – Tea hming a lian zui!
All Star MVP atan Runmawi team star player, Zemabawk BC tana MSL X a inlan Perkins Jr. thlan a ni bawk.
All Star zan a hit tawk lo!
Mipui hlut, ennawm ruaitheh zan All star night hi tum dang leh kum dang aiin hlut a hlawh tawk lova, he hlimthla hi infiamna huang dangah pawh hmuh tur a awm tam ta – hun rei tak chhung kalphung ngai leh tihdanphung ngaiin mipui a hip loh zia lanna a ni.
Football leh Volleyball league lian ber te pawhin hetiang hi an tawk ve chawk; amaherawhchu, mipui mar dek zar zawnga tihlar (promo) lama fing leh fim hmasa tan mipui koh khawm hi a har lo – rei tak, slam dunk contest ang te kha host Mafaka Dance khan tiphur thiam teh mah se, a ninawm hman!
Zai leh lam, thiam thil leh theih thil, hahdam leh pangdam zan nuam zawk All Star zan a inherchhuah leh theih nan bengsika ngaihtuahna sen a tul e.
Senso sum leh pai dap kawngah fimkhurna thawm lian chho ta hi a lawmawm a, hnam ke chheh inher rem zia a ni. Chutih rualin, a thlawna mahni in lum atanga inkhel chhim te hian chhut zui tur ba kan nei – kan hlut zawng man chawiin lei ve kan ngai, a thlawna dawn leh hmuh tumna hian hmasawnna a nam thlu – tho la, a hmunah en ta che – MSL X hi!
Hoops Mania Time Out
Fakna, zir tur leh entawn tur chhawpchhuah hun kan lo thleng leh ta, mit i meng zau leh zuai ang aw.
Zarkawt pa dam dup, Marc Tetea Sailo hian Hoop2Hoop Basketball Academy dinin, hei hi Mizo naupang ten screen time an ngah lutuk an chhiatpui mek lak ata ralven dar khawng rikna a ni a; tin, physical fitness leh exercise an mamawh em avangin basketball hmanga an thlan te a lo chhuah ve a, hriselna tura an lo hman theih nan leh he mi bakah hian basketball lamah hmasawnna tam tak basic fundamentals nuam ti pah si a an zir theih nan a siam kan ni.
An tuina leh nuam an tihna hmang a, hriselna lamah hmasawnna an neih theih nan buatsaih a ni a, sava pahnih lung pakhata vawm thlak he academy hian an tum a ni ber e.
Tunah he academy hian zirlai 70 chuang neiin, Dawrpui leh Zarkawt basketball court-ah training neih thin a ni.
Naupang te mahni in/room a in khung reng ai chuan hun reilote lo chhuak a, mi dang te nen a inkawm leh nun ho an zir hi school piah lamah a pawimawh em em a.
School ah pawh room khat ah thununna (discipline) khauh tak hnuaiah lehkha an zir a. Chu mi avang chuan he academy ah hi chuan nuam ti tak a thiante leh mi dang te nena hun thawl tak leh thawveng taka hun an hman theihna hi he academy hian a ngaipawimawh em em a. Naupang nun thianghlim tak mai chhawm nun leh an hma hun a tan a lo kaihhruai hi an tum ber a ni.
Nu leh pa ten infiamna hmanga fate nun kawng sial chungchangah hian ṭhanharh zual a ngai hle. Mahni in a tawm ngut ngut, rilru bawrhsawmpui pui, mi huatthu sawi lama fitness tha zet; mahse, thlantui seng zawnga che chhuak ngai lo, social media vela hriam leh hraw tak taka thuchheh ching te kan pung ta hle.
Mahni kawngkapui theuh pela Zonunmawi kai tho leh tura taksa hrisel leh rilru hrisel pu tura thawh suau suau hi a changkang takzet.
HoooptoHoop Basketball Academy din chhan hi chhuang takin The Aizawl Post Hopps Mania chuan kan rawn kurpui e.