Sharda University Mizoram Super League hmawrbawkna zan hnuhnung ber a thleng ta – Mizoram basketball chanchina inelna sang ber thununtu club pahnihte inlan zan hian R. Dengthuama Indoor Stadium-ah mipui an fuankhawm dawn a, ticket chang tura a hmun pan hma a fuh ang.
Hawi let ang
Kum 2015 ah MSL a piang a, season hmasa pahnihah hian tuna Khatla TBL coach Mapuia hi player cum coach a ni a – MSL 1 leh 2 nomawi an chawi.
MSL 3 a inherchhuak a, Mission Veng thalai rual leh an thian veng danga mite inthurualin sum an thehchhuak a – Ronald March hovin MSL 3, kum 2017 khan an champion.
Kha champion team, Mission Veng Vikings kha Khatla TBL leh Zarkawt BCA laka MSL nomawi chhuksak thei awmchhun tun thlengin a la ni! Hemi tum hian Reuben Hnamte chu Vikings coach a ni.
MSL 4 a rawn thleng a, Zarkawt BCA an inthuam thar a, a zawn zatin season 4 chhung MSL trophy an la.
Season 4 – 7 an champion tum hian Dawrpui tlangval Lalruatfela (Afela) chu BCA head coach a ni a, tuna BCA head coach Marc Tetea Sailo hi he’ng season 4 chhung hian Asst. Coach a ni thin.
MSL 8 kan chuang kai a, vawi tam final match lo khel dun tawh Khatla TBL leh Zarkawt BCA an inhmachhawn nawn leh a – TBL in BCA lakah lal anga an lenna MSL boruak chu thlakin TBL bhavan lamah nomawi an chawi let.
Hemi tum hian Vanlalnunsanga Ralte (Lana) chu TBL head coach a ni.
Season liam ta, nikum MSL season 9 khan Zarkawt BCA in Khatla TBL hnen atang bawk hian MSL nomawi an chhuhsak ve leh thung.
Hun rei tak Zarkawt BCA Asst. coach Marc Tetea Sailo chu head coach a ni ve ta thung. Tuna MSL X commentator Ahruaia hi TBL coach a ni nghe nghe.
-- Advertisement --
MSL nomawi chawi tawh head coach-te
1. Lalruatfela (Afela) – Vawi 4 BCA
2. H. Laldinsanga (Mapuia) – Vawi 2 TBL
3. Reuben Hnamte – Vawi 1 Vikings
4. Vanlalnunsanga Ralte (Lana) – Vawi 1 TBL
5. Marc Tetea Sailo – Vawi 1 BCA
Club pahnih rorelna MSL
MSL X ah hian mipuiin Zarkawt BCA tum nga champion tawh leh Khatla TBL tum thum champion tawh hneh apiang club an tan ta emaw a tih theih hial!
He team pahnih changtlung tak, tantu ruhkawl tam tak nei erawh hi chu ‘a hun tea rah thin’ tih ang mai kha a ni a, finals an zin kawng a khirh deuh tum pawhin daltu an awm hlei thei lo! An tlo a, an fei a; an team dinchan theihna laimu chu tualchhung Mizo player tha an ngah a, hnam dang player lakluh fuh loh tum pawhin an tualchhung player thate hi an innghahna an ni zel.
MSL finals game 3!
Champion ngun zawk Zarkawt BCA hi talbuai deuhin bul tan mah se chak loh ngai thei lo an Mizo player leh Tamilnad kristian tlangval Justin an nei a, tum hnih chak lova bul tan kha team nghet leh tlo zawk an ni.
Finals game 2 a an khelh anga theihtawp an chhuah a, an beih leh phawt chuan player kim dawn lo mah se an deh a khirh viau ang.
Khatla TBL hi an dam tlang a, an kim thap thei dawn bawk – hnehna nomawi nena TBL bhavan lama let tura ring an kuh tul.
Chutih rualin, an club chairman Pu Tluangtea nikum lama mual letliam lama liam ta puala MSL X nomawi chawi chaka an tuihalna hi a lian em a, second tin an tan a hlu zual bik.
Club innghahna veng pahnih mipuite an fakawm takzet. Khatla mipui an tlim hmur a, fans ngah zawk an ni; chutih rualin, veng lian ni bik lo Zarkawt mipui pawhin stadium mawi hmarhin an veng club tan rawl an chhuah e.
BCA leh TBL hian hmun hrang hranga tantu an neih te an fakawm thin, zanin hian inkhel chhim tum hrim hrim pawh an tam leh hle ang. MSL X inkhel ruai ropui tawp zan ni tlat hek le.
Thlirlawkna fir thak
The Aizawl Post Hoops Mania zawhna chhangin, “Finals Game 3 kan en tur hi game hmuhnawm ber a ni ang em tih chu ka hre lo a, mahse, game ‘technical’ ber pawl a nih ka ring. Court chhunga inlan tur player-te inelna tluk zetin ‘Coach Battle’ hi a pui turah ka ngai bawk.
“League Round (80-85) leh Finals Game 1 (73-78)-ah khan Zarkawt BCA-te point 5 ve vein an chak lo kha a ni a. Chutah Lalrina a inhliam zui nen, mi tam tak chuan Khatla TBL-te an champion zui mai dawn emaw kan ti hlawm furin a rinawm a, mahse, Zarkawt BCA-te kha Game 2 ah khan ‘vanneih vang’ ngawt ni lovin, awmze neiin, chak phu zawkin an rawn thochhuak a nih kha!
“Game 3 ah pawh hian Khatla TBL lamte’n ruahmanna thar nen an rawn inbuatsaih tha viau a nih loh chuan Zarkawt BCA denfense hi thiah a har mai thei e.
“Game 1 ah khan Khatla TBL lamte an kut a kal tlang khawp mai a; James-a leh captain |hazuala bakah ‘Player of the Match’ a thlan Emmanuel-a te 3pts kha an chakpui a tih loh theih loh a.
“An shooter-te’n hmun awl an neih theihna’n Court chhunga TBL ball inpe kual leh, an screen action-te kha a hmuhnawm tham takzet. A chhunga kua an hreuh thiam zarah a pawn lamah an shooter-te’n hmunawl an nei thei zel bawk a nih kha.
“Mahse, Game 2 ah erawh Zarkawt BCA 2-3 Zone Defense a Patel-a hova Justin-a leh Matthew-a te inkawp kha Khatla TBL lam khan an su hawng hlei theilo a ni ber a.
“Chutah a hmaa ding Zonuna leh R-a bakah Hmachhuana te lah an tawlh rang viau mai bawk kha a nia. Transition a nih loh chuan 2nd Half ah khan a chhung (paint area) atangin Khatla TBL khan an score thei mang lo. Captain |hazuala dawng viau lo phei se chu an chak lohna kha point 6 lek a ni lo hial ang.
“Game 2 ah Zarkawt BCA tan an foreigner Cunningham-a kha time a chang mang lo a. Khatla TBL tan an inter-state player Yadwinder-a a inlan miah lo bawk.
“Tin, player roatation chungchangah hrim hrim pawh Khatla TBL lam an inthlak mawh ang reng viau a, a tifuh lo zawk an ni em tih pawh inzawh theih tak a ni.
“Chutih rualin Zarkawt BCA tan erawh ‘option’ nei tlem zawk angin lang mah se rotation tifuh zawk an niin a lang a. ‘Do or Die’ game-ah an rawn ding changin, dinhmun inangah an rawn ding leh ta a ni.
“Game 1 a Khatla TBL thatna kha Game 2 ah Zarkawt BCA lamte’n an rawn dangchat thei a. Game 3 ah hian thil thar/danglam rawn lantir thei tur khawpa player leh coach nei tha team pahnihte hian – eng game tak rawn khel chhuak tak ang maw?
“1LA lamah nge Zarkawt pheiah nomawi hi hawn a nih ang le?” tiin Ahruaia, MSL X commentator ni mek bakah MSL-a coach leh manager lo ni tawh chuan a thlirna a sawi.