MSL X last 4 game 1: Khatla TBL vs Zemabawk BC Thazuala nge Rozama zawk?

MSL X last 4 game 1: Khatla TBL vs Zemabawk BC
|hazuala nge Rozama zawk?
Sharda University Mizoram Super League March ni 11, 2025 a tan chu thla khat dawn khelh a nih hnuin, zanin April ni 8, 2025 hian R. Dengthuama Indoor Stadium-ah knock out round khelh a ni dawn.
League round lama hneh lo tawng lo Khatla TBL hian MSL kai thar Zemabawk BC hmaah eng tiata lian leh tha nge an ni tih fiahna hun an nei nawn leh ang – anni pahnih hi league round lamah lo intawng tawhin, Khatla hian point 2-in hnehna an chang tawk a nih kha.
Zanin hian semi final best of three series khelin final luh inchuhna boruak sang tak he team pahnih hian an hip dawn a, tunge ding chang zawk tur tih hi zawlnei nazawng tan pawh hriat har tur tak a ni!
Khatla TBL tan hian tum thum zet player of the match ni thei Emmanuel-a leh tum hnih he lawmman hi lo dawng tawh an captain tha za zet ?hazuala an nei a, MSL X chhunga hnam dang player zinga khel tha tluang pangai ber James an kawl bawk.
Sawi hmaih theih loh coach H. Laldinsanga (Mapuia) hian kalphung fel tak nen a team hi rawn uapin, ani hnuaiah hian Khatla TBL champion beiseiawm ber tum kan hmu.
A player-ten an zah tham Mizo basketball legend Mapuia hian tawnhriat leh thiamna (NIS Coach/Indian basketball national coaching staff hiala inlan tawh) a neih hi semi final lut zinga team inkhairual ber a nih tir zui tlat – an supporter erawhin semi-final lut zinga fans nei tha ber Zemabawk BC an hmachhawn dawn tih hi an hriat a ngai, a hmunah tawiawmtu an mamawh hun a inherchhuak ta.
Zemabawk BC hian tantu an neih that hi hmachhuan tham a ni a, team hnunga ding supporter rual tha semi-final lamah hian kan hmu lehin a rinawm – anni hi team thahrui an ni. Coach Sangpuia hi thurawn la thiam leh bengkhawn thiam a ni a, player enkawl harsa tih hriat tak, Perkins Jr. erawh a thunun that bakah a ruahmanna anga a nau hi a khelh chhuah tir theih chuan chakpui tham a ni.
Kan Mizo inkhel kaihruaitu match official-te hian dawhtheihna sang tak nei lo se, Perkins Jr. hi a chung a pik viau thei – fimkhur teh se, a team tan!
He’ng karah hian Kanan tlangval, an captain cool Rozama hi court chhunga inkhel khai pa ni theia team a kaihhruai a an inlan theih phawt chuan, Zotlang tlangval Rinchhana leh Nitish Beniwal tan Khatla TBL hmaah hian hna hautak an chhawpchhuak leh ang.
Venthawn tur leh delh rittu (pressure) nei lo Zemabawk BC hian hahdam takin semi-final hi an khel a nih bawk chuan hneh loh tur bik an nei lo – an team chhung boruakah thui tak a innghat e.
Semi-final hi match thum khelh tura duan a ni a, match hnih chak zawk zawkin final an lut thei ang.
Semi-final lut zo ta lo – Champhai BC, Saron BC, Bungkawn LB Associates leh Electric BC-te hian MSL a khelh chhunzawm tumin inelna hautak, relegation playoff an khel zui bawk dawn a ni.
MSL atanga tla tan player tha chan bakah team insawhnghehna lungphum thleng a nghawng theih avangin anni team pali hian hmunawl pakhat an inchuh hi rin aia boruak nei lian tur a ni a, basketball ngaina tan chuan bengkhawn zui tlak a ni.
Hoops Mania Time Out
MSL X board secretary Pu Richard Lalduhsanga chuan, “Inkhel hmuhnawm leh pawimawh bik thlen hun kan chuangkai leh ta a, mipuiten inkhel a hmunah min rawn tawiawm a, hlim leh nuam ti taka zan lam hun hi rawn chhim turin ka sawm che u.
“R. Dengthuama Indoor Stadium-ah hian ei leh in tur lei mai theih chi hrang hrang bakah inthiarna hmun nuam tak a awm vek a, security tha tak an awm tel avangin chhungkua pawha inkhel hi en a him hle,” tiin inkhel en tura thawkchhuak turin mipuite a sawm a ni.
Hetiang hian inkhel ticket lei dan tur leh thutna hmun MSL puipa lamin an duang: Courtside (front row) Rs. 300 man a ni a,
triket.in lamah online kaltlanga book tur a ni.
General (second row) Rs. 150 leh Gallery (a chung) Rs. 50 hi a hmun ah lei tur a awm bawk. Cash leh gpay a theih vek.