MSL X last 4 game 2: Zarkawt BCA vs Chanmari BC Matthew Sailo nge veteran Moses?

MSL X last 4 game 2: Zarkawt BCA vs Chanmari BC
Matthew Sailo nge veteran Moses?
Sharda University Mizoram Super League X semi final inkhel hmuhnawm lawrlak tur zanin dar 8:30 pm hian chhawpchhuah a ni dawn.
Veng inthenawm, basketball leh cricket thiam veng – Zarkawt leh Chanmari te hian an veng tihmingthatu te inkhel hi an tawiawm loh ring suh – tlawm zawk nih hrehawm dan tur leh chak zawk tana veng thenawm chunga hnehna hlado chham nawm dan tur hi mihring leh mi hlim tawnga hrilhfiah chi rual a ni lo!
Infiamna piah, veng rilru (feeling) lanna a ni pah dawn a, R. Dengthuama Indoor Stadium lamah thawm a tha ang.
He veng pahnih basketball club te hian player tha bik leh thiam fal bik an kawl hi basketball ngaina tan chuan a hmun ngeia an inkhel en phahna tham a ni thin a, a ni zui zel bawk – club supporter-te tan khuang nena thawhchhuah hun a ni ta.
Semi final hma hian MSL atanga tlak (relegation) duh lo leh tum lo bur inkhel dar 5:30 pm ah a awm dawn a, Champhai BC leh Electric Veng BC ten inelna hautak an hmachhawn tur hi a en tham fu bawk ang.
MSL nomawi kawltu thlir thuak ang
Zarkawt BCA in MSL nomawi tum nga an chawi tawh hi hlu teh mah se, hun liam tawh a thil thleng a ni. Hmathlir neia tuihal tan league round lama an ngam loh Chanmari BC hi Matthew Sailo captain-na hnuaiah hian hneh loh nawn hi an tualchhung star player rual hian rem an ti lo tawp ang – inkhel tang leh boruak sang tak a ni dawn sa e!
Zarkawt BCA lam hian MVP ni lai, Lalnunpuia Renthlei (R-a) hi minute tam zawk khelh tir ta se; point guard fing Zonuna leh Zofate zinga a kut leh basketball inzawm hlawhtling ber Lalrina Renthlei te hian pressure nei lo se; palian ngainatawm (Chicago, sap rama basketball lo zu khel hrep tawh) captain Matthew Sailo hian hun harsaa team a suihkhawm that thin ang ngei khan team phuarkhawm leh bawk se – bench lama talent tha kawltute leh an hnam dang player Cunningham danglam zuiin mimal lansarhna hnawl zel se – champion nomawi an hlat lo!
Chu mai a ni lo, mipui barakhaih tur leh MSL X semi final boruak ti lum zual hak tur, an inter state player tharin zanin hian stadium kawngkapuiah ke a rawn pen lut dawn – Zarkawt BCA hian player lakluh kawngah mipuite thin thawng dawt tur an hre leh ta – ‘the tower is here!’
Chanmari BC thlir nawn thuak ang
Chanmari BC an ni tawh a, an club history sawi apianga ‘Vikings an nih lai chuan…’ tih ai chuan club neitu Zothana leh an veng basketball meichher ti eng zual zeltu Reuben-a te hian Chamari BC anga history thar ziah hi an thlahlel zawk ang – shabash!
Head coach Nuna tan an team hi khelh that ni leh khelh chhiat tum nei an ni tih hi a pawm ang – a tawnhriat neih ten he thil hi a haider tir lo tawp ang.
Fit 6’5 zeta sang, big Mike hian basketball piah lam hi MSL X chhungin ‘bye bye’ se, a theihna leh MVP nih a inhlat lo.
Kanan val Nuna hi player of the match-a thlan mai atana iaiawm loh kha a ni a, ani kiangah hian Michael F-a hi tunge a ni tih sawi nawn a ngai lo.
Samson-a hi Bible leh MSL X chanchin ziahnaah mi thuhmun an ni lo tih a hriat nang a – chakpui tham ve ve an ni!
Captain sulhnu nei tha Moses-a hi a la tar lo va; GD Magee hi dan ngaihna awm lo a nih nawn leh chuan Chanmari BC hi MSL X champion an ni ang!