MSL X – Tlin leh tlak inkar! Saron par thliah tum Champhai!

MSL X – Tlin leh tlak inkar!
Saron par thliah tum Champhai!
Sharda MSL X-in a vawrtawp a thleng chho mek a; mimal che tha fal, MSL finals khel tur leh Saron BC leh Champhai BC bukin an awm hun kan thleng ta – zanin dar 7 hian R. Dengthuama Indoor Stadium pan hma a fuh ang.
Player quality sang pahnih awm khawmna, semi finals khel ngei tura beisei pahnih hi an ke chheh a phet palh a, duhthusama an insiamrem hmain relegation playoff finals (best of three series) khelh an tul. A tla zawk division hniam, a chak zawk MSL club ngat an ni zui dawn.
Hawi kir zuai ang
MSL X organising committee chungah hian Mizorama basketball thuneitu sang ber, Mizoram Basketball Association (MBBA) a awm a, an pawl president
Pu R. Lalnunpuia (Durtlang Leitan) chuan The Aizawl Post Hoops Mania zawhna chhangin, “MBBA programme reng reng hi MSL tiamin MBBA chuan tualchhung player-te chawisan (promote) hi a thupui ber a ni.
“Interstate leh foreign player-te erawh kan league min promote-tu an ni a, kan ngaihlu em em tho. Chutih rualin, kan league sang berah hian kan tualchhung Mizo player-te’n tan an lak lehzual theihna turah ngaiin player of the match (PoTM) hi chu tualchhung player-te atang chauh an mimal chet phung (statistics base)-in thlan thin ni se tih a ni thung.
“Finals-ah erawh MVP hi chi hnih – tualchhung player (son of the soil/local player) atang leh MVP pangai a hranpaa siam tum a ni thung,” a ti.
MBBA Secretary Pu Zomuanpuia (Mission Veng) pawhin an president thusawi hi thlawpin, “A thiam thiam leh a tehfung (stats.) lama tha tha thlan mai awm alawm tia inhnial theih tak chu a ni. Fair lohna lai pawh awm thei tho mai, mahse, kan tualchhung player-te tihhmasawn (promote) tul vein kan hre si a,” tiin MBBA hian Mizo player chawikan an tum ber thu a belh ve bawk.
Saron BC bihchianna
An head coach Vanlalnunsanga Ralte, Lana (Khatla) hi tunlaia Mizo basketball coach tha ber zinga mi a ni.
MSL 1 leh 2 khan Khatla TBL player a nih laiin MSL nomawi a lo chawi tawh a, MSL 8 khan head coach angin nomawi a lo chawi tawh bawk.
He a MSL sulhnu hi player a enkawlna kawngah leh thutlukna huaisen (risk) a lakna thinah a tangkaizia kan hmu ta fo a – player leh coach (player ni tel lo, coach chauh ni – full time coach)-te zinga MSL nomawi chawi awmchhun a ni – mi bik a ni tih phat rual a ni lo!
Saron BC lamah hian player langsar fal nalh an awm hran lova, Lana enkawlna hnuai MSL X-ah erawh T. Lalhriatzela (Tea) leh Lalchhanchhuahate chu club dang chil tiput tur khawpin Saron Veng BC squad chhah vak lo karah an rawn vul viau.
Ball khalh lem lova shoot nghal mai thei an interstate player Tyagi hi a rintlak viau rualin, an foreign player Elombi erawh hi chu an lalut fuh tawk lo tih an match kal tate khan a nemnghet!
He’ng karah hian chanchin lawmawm an neih chu Saron BC tualchhung Mizo player-te hi phit tak tak, game rang khel thei thiau an kuh tul hi Champhai BC lam tan ven a ngai dawn – zanin dar 7 hian tawiawmtu neih that leh that lovah erawh thui tak an innghat e.
Saron Veng BC manager, an veng pa Afaka chuan, “Inbuatsaihna hi chu a pangngaiin a kal reng a, chawhnuah a nih loh chuan zan lamah kan practice thin.
“Kan vawi khat MSL khelhna mah ni se beisei kan tisang ve viau a, semi finals luh kha kan inbeisei a ni, mahse, uiawm zet zetin kan han chak lo kha a nia, kan tihsual bakah vanduai a tel ve niin kan hria.
“Kan MSL inlan hmasak berah hian point box chu kan ni bik lo va, team dangina min hneh dan pawh a tam zawk chu inhneh tawk tawk chauhte a ni a, kan lawm hle a ni.
“Champhai hi league round-ah khan basket khatin kan hneh lo tawh a, ‘kha game kha MSL kan khelh tawha kan game la chhiat ber tum a ni’ kan ti hial.
“Relegation battle finals-ah erawh hi chuan rawn insiamthat kan tum hle a, fans lam pawh a hmun ngeia min rawn tawiawm turin kan sawm tak zet che u a, Saron Veng leh Saron Venga lo awm tawh hmun hran hrana mite pawh min tanruapui turin kan sawm tak meuh che u a ni e,” tiin The Aizawl Post Hoops Mania a hrilh.
Champhai BC bihchianna
“Zanin dar 7-a Champhai BC leh Saron BC-te’n relegation platoff finals game 1 kan khelh turah hian Champhai BC chuan Champhai mipuite leh hmun hrang hranga min tantute tawiawmna kan mamawh hle dawn a, R. Dengthuama Indoor Stadium l-ah a hmun ngeia min lo tawiawm a, chakna kan chan ngei theihna’na min lo pui turin kan sawm mawlh mawlh a che u,” tiin Champhai BC manager Pu PC Ramnunsiama chuan Hoops Mania kaltlangin sawmna a siam.
An coach Lalmuanpuia Zote hian player angin tawnhriat thui tak a lo nei tawh.
MSL 1-ah khan Chaltlang Riders tan lo inlan tawhin, MSL 2 leh 3-ah khan Tuikual South tan khelin MSL finals hial an thleng a nih kha.
MSL 4 khel lovin, 5-ah erawh Ramhlun Sporting Club tan a MSL mangtha kum a hmang.
MSL season X a rawn inherchhuak a, Champhai BC coach a ni zui ta hial!
Mapuia Zote hi inthlahrung tak ni mah se a theihna erawh thup hleih theih a ni lo!
Champhai BC sawi chuan an captain Lalropuia – vawi thum MSL X player of the match ni thei hian bul tan loh a thiang lo!
A vanglai a hmang mek a, MSL hmel lanna a ni chho hialin a rinawm. A khelh fuh tum chuan Samuel LR Tluanga hi fans tan kut benna tur ‘khilai’ thei reng a ni.
Hmel hmuh tur tam ve tak mai, an foreigner ‘Everywhere’ DC Franklin hian team game a khelh phawt chuan MSL-ah Champhai hi inhamtang turin ‘chance’ an nei tha – coaching staff lam hian ‘picnic type’ MSL X a nih lohzia hi an innghahna Franklin hi fah teh se!
Mizo player hming thurchhuah phu an awm, an hmabak an hlenchhuah dan milin hupbeh rih hun a ni.
Hoops Mania Time Out
MBBA joint secretary Pu Jimmy Lalmalsawma (Dawrpui Vengthar) chuan, “Inkhel hmawrbawk a ni chho zel a, ticket a hmunah leh online hmanga hralhchhuah kawngah mipuite’n awlsam zawka an lei theih turin kan chhawpchhuak a; MSL X min ngaihhlutsaktute chungah thinlung takin lawmthu MBBA hmingin ka sawi e. A hmun ngeia inkhel rawn en zel turin mipuite ka ngenin ka sawm e,” tiin The Aizawl Post Hoops Mania a hrilh.
MSL X leh a hma lamahte pawh mi thilphal leh inpete an rawn pen chhuak thin a; Pu Lalengkima, Zarkawt (RB Impressions)-te chhungkua chuan kumin MSL X-ah pawh hian referee-te hak tur an rawn tum sak leh a, anni ang rim leh hah taka hnathawk thinte’n Mizoram basketball tihchangtlungna tura thilphalna ban an rawn phar chhuak thin hi a hlu takzet a ni.
Anni lam hian inphochhuah duh lo teh mah se The Aizawl Post Hoops Mania chuan fakna dar ring takin kan rawn khawng e…