MSL X: Veng inlungrual Saron an vul! Champhai an chuai – Overtime 16 secs kha!

MSL X: Veng inlungrual Saron an vul!
Champhai an chuai – Overtime 16 secs kha!
Sharda University Mizoram Super League-ah MSL XI khelh chhunzawm tum leh tlak loh tum, relegation playoff finals Saron BC leh Champhai BC in April ni 23, nilaini zan dar 8:30 pm khan best of three series, game 2 an khel a – game 1 lama hnehna chang tawh Saron BC in Champhai BC hi hun pek belh (Over time) ah an hneh hram, an vannei hle a tih theih.
Player of the match atan T. Lalhriatzela (Tea) chu thlan a ni. Ani hian 24 pts, 4 asst leh 7 stl zet a nei!
Kha kiu kha!
He inkhel inhnehtawk takah hian ‘kha kiu kha’ inelna boruak danglam taka thlak hlawktu a ni!
Referee ham rik a ri tuar a, match official Mawitea hma ah tak thil thleng hmuhnawm loh zet a thleng – Saron BC player Tyagi chuan Champhai BC player a kiu ngei maiin a nghawk lui!
4th qtr minute 8:44 a ni a, Champhai BC bench lamin an player tlu thal huang hi ngawi renga thlir harsa an ti a – ri laih a awm zui! Dirty Tyagi tia sawi awm se – a chet dan kha tenawm tlat hek!
Match official lam chinfel nghak zo lo Champhai BC tangulh kha an va hriatthiamawm tak; mahse, danin a hrethiam lova – Champhai BC manager leh player pathum inkhel thei lovin hrem zui an ni a – Champhai BC captain Ropuia hrem zingah a tel!
Tyagi hrem zui a ni a, Saron BC in he thil thlen hnu hian tawiawmtu mipui an ngah an chhawr a, talbuai lovin hun pek belhah an chak zawm zat.
Match official che ‘cial lo!
Champhai Basketball Club lamin hrem tawk an player tha chan mah se, huai takin an bei let a – over time second 16 a la awm a, 3 pts DC Franklin-an a shoot a, a lut zui – Saron Basketball Club player a foul ngeiin a lang; mahse, foul ham a ni lo – replay vawi tam ennawn hnu hian referee lam thutlukna a dik lo – vawi 99 tha takin ti dik mah se, hun tawp pawimawh lai taka referee te chet sual khauh vawi khat hian MSL club kha D league lamah a suan thla dawrh thei – inelna hi a nunrawng leh thin!
Inkhel piah chhehvel
Champhai BC hi an district hruaitu lam thlenga tawiawmtu nei tha an ni a, an player-te en in hei aia tha hi thleng tura beisei an ni – an liam a tul ta miau si a – mangtha ule…
Saron BC hi an tualchhung players hriathlawh tawk lo ten tunge an ni tih an pholang ta – Biakmuana an veng tlangval ngat te hian an veng an tihmingtha hle.
Saron veng hian MSL X ah hian tarlan an nei – veng inlungrual an ni – an tum champion chawi ta chiah lo mah se, club in a mamawh lai ber hun khirhkhanah tawiawmtu Saron mipuiin R. Dengthuama Indoor Stadium-ah lam an thai, an par e!
Inkhel thlir zuai
Saron BC tan game hmasa lama player tangkai Hmachhuana (8 pts) khel a dam leh dup a, a ball sem chhuah a tha lehpek hle.
Biakmuana (9 pts) leh Elomni (22 pts) langsar vut lovin an khel a tha leh thluam a – Saron BC danglamna chu team khel an khel chhuak thin leh ball an in pass kual mawi tak, mimal langsar vut lo thin hi a ni. Coach Lana thluak a fakawm nawn leh e.
Champhai BC erawh DC Frank-a (36 pts) kutah an innghat thui lutuk hi, an elpui tan dan chah an awl – mumal taka ball an inpek kual hmuh tur a vang thin. Ropuia (20 pts) erawh club tam tak chil tiput zual turin a theihna a lantir leh a, Sangliana awm lo erawh an tuar!
Coach Mapuia Zote leh a staff ten tualchhung player laka rinna an nghat ngam tawk lo kha dem tur an awm ngai a nih chuan an inbihchian a tul ang!
Hoops Mania Time Out
Saron BC manager, Afaka chuan, “Saron Veng mipuite leh hmun hrang hranga Saron fans ten min tawiawm tha a, nangmahni avangin inkhelh boruak pawh a nuamin a thlamuan thlak thin hle mai, in zavaia chungah lawmthu kan sawi tak zet a, MSL 11 ah min tawiawm leh theuh turin kan ngen tak zet che u a ni” tiin The Aizawl Post Hoops Mania kaltlangin lawmthu a sawi.
Champhai BC an rawn let leh ang – sahuai erawhin hahdam a mamawh.