MSL X: Zarkawt BCA vs Electric BC Inkhel tihtawp a ni! !

Sharda University MSL X Champhai Week match hnuhnung ber chu March ni 21, Zirtawpni zan dar 7 khan Champhaia Vanlallawma Indoor Stadium (VANIS) chhunga entu mipui khat vek karah Zarkawt BCA leh Electric BC-te’n an khel a, 2nd qtr minute 8:28 khelh tur a la awm a, Zarkawt BCA-in 38-15-a hma an hruai mek laiin MSL chanchina a tumkhatna’n basketball backboard chu dunk chhiat a ni – Hulk Cunningham, Zarkawt BCA player kum 29 valin he thil hi a thlen tir!
Basketball vawm luhna biala uai chunga ball hnehsawh tak maia vawmluh hi khawvel huap pawha inkhel entute mit titlaitu ber leh a vawrtawp a ni a, tunlai tawng takin a bawn – hei aia ropui rapthlak zawk chu inkhelh tih tawp lailawk ngai khawpa basketball backboard chhe hial khawpa dunk hi a ni!
MSL puipate thuchhuak angin he inkhel hi chhunzawm theih loha a chatlak tak siah chuan team pahnihte hi zanin, March ni 24, Thawhtanni zan hian Aizawl (R. Dengthuama Indoor Stadium)-ah khelh that leh tur a ni.
He inkhel a hmuna en hi an pung hluai dawn tih a chiang a, MSL boruak chawk tho zual sauhtu Cunningham hi Electric BC player tan ngawih tir a chakawm dawn.
MSL X Time Out
Mizorama basketball inelna level san berna MSL aia inkhel boruak sang leh zauthau zawkna a awm, Inter School leh College-te an ni. Hetiang boruak hap pha ve tur chuan zirna thlahthlam lova zirlai nih a ngai.
He’ng thu kan tarlan lai hian Lalhnehpuia Chhakchhuak s/o Aldrin Lallawmzuala, Zarkawt tuna Chicago, USA-a lehkha zir mek chu CCIW Dave Wrath Academic All Conference chawimawina chu a vawithumna’n hlan leh a ni.
He award hi Illinois leh Wisconsin state-a university hrang hrangte sports lama inelnaa tel thin zirlai (student athlete) kan tihte hnena pek thin a ni a; he award dawng tur hian GPA 3.30 chung lam hmuh a ngai thung.
Award hian sum (monetary benefit) keng tel lo mah se an hma lam (career) atan a pawimawh hle. 93% aia sang course tinah hmuh a ngai a ni.
Hnehpuia hian Semester pasarih an exam tawhah GPA 4/4 a la hmu ziah a, an university bikah pawh Deans list-ah a la tel pha ziah bawk.
Ani hi NCAA third division khel mekin, North Park Vikings men’s basketball team-ah a tel mek.
Zarkawt BCA leh Khatla TBL tan a lo khel tawh a, MSL hlutna belhchhah thintu hi The Aizawl Post (Hoops Mania) chuan zirlaite entawn atan chhuang takin kan rawn tarlang e.