MSL XI – Zemabawk BC leh Khatla TBL chak Hawla Indoor Stadium-ah Chapchar Kut…

MSL XI – Zemabawk BC leh Khatla TBL chak
Hawla Indoor Stadium-ah Chapchar Kut…
MSL XI league round khelh mekah March ni 11, 2006 zan khan vawi thum chak lo zawn tawh Zemabawk BC chuan Saron BC hnehin Mizoram Basketball Kutpui an chhim ve ta tak tak e!
Zemabawk BC coach Sangpuia leh a asst. coach V-a te pahnih hian an hnung lama ZBBC thluakbur (think tank) pali Ricky-a, Ab-a, Ruatpuia leh Rca te hi an tangkaipui nge an pahnih hian zalen taka ro an rel hi fuh zawk ang?
ZBBC hian Saron BC nena an inkhelh tumin, an defense tiphui turin Tyson-a a tangkai takzet. Saron BC hian pawtthla maithei dinhmuna an din laiin, ZBBC hian head coach challenge hmangin game an pawt ding a, match result ZBBC lam tana tha tur zawnga a inthlak thleng chho hlawk kan hmu zui – hmuh tel kan neih chu ZBBC puipa lam pressure hnuaia an so hluai thin hi!
Chak loh chuan semi final luh loh a ni deuh mai tawh a, ZBBC hian an star player Ropuia theihna hmang tangkai thei turin hun an pe tam ta deuh bawk a, ani hi player of the match ni zuiin point 26 lai a nei. An inter state player Pratyianshu Tomar chuan point 32 bakah rebound 16 a nei pha hial bawk! ZBBC hian an star player Thianga minue 23:25 hun an pe a – chak mah se player siksawi kawngah hian an head coach hian engtin tak ruahmanna siam zui ang maw?
Inkhel hnuhnung zawkah MSL X finals rematch kan hmu a, inkhel hmuhnawm chungchuang bik a ni. Khatla TBL in Zarkawt BCA chu 69-64 in an hneh a, point 100 chuang awlsam taka nei mai thei pahnih hi an defense a phui tha dun bawk a, an innawr nat ang hu in point an nei tlem dun hle.
BCA an chak lo ta – MSL 11 ah! TBL erawh an kim ta bawk a, an match hmasa bera an tawlhthlu tih mai loh chu ngamtu an nei ta lo. He inkhela player of the match Khatla TBL captain hian point 14 neiin, AJ Singh-ah point 17 a nei thung.
Zarkawt BCA coach, K. Vanlalruata (Mr. Cool) hian a player-te a hrechiang a, rem pawh a rem fuh viau thin; Khatla TBL coach, Mapuia hian thluak indona lama a khingpui tur hi a zuam zui ngawtin a rinawm loh!
Khuangte leh lamin
Chapchar Kut
Zanin hian kartawp a lo thleng leh ta tih a ni satliah dawn lo, Chapchar kut, kut zan hmangin Hawla Indoor Stadium-ah khuang a ri dawn a, lamthai paha inkhel thlir tur a awm dawn bawk e.
Zanina inkhel result hian semi finala-a inhlang kai tur leh relegate thei mai turte a hril dawn avangin a hmuhnawm viau ang.
Hoops Mania Timeout
Hlawh neia rawih players, coaches, match officials leh commentator bakah ground duty thlengin sawiselna hi lak nat lutuk loh tur!
Vantlang hmaa inlan, hlawh nei te hian abikin sports huangah phei chuan fakna dawnna remchang tha dawhsan an nei a, heng karah hian duhkhawp lo an lo awm a nih pawhin rilru zau tak put thiam hi an mawhphurhna a ni tel.

Zanina inkhel turte:

Tuikual South Vs Khatla TBL – 5:30 pm
Chanmari BC Vs Zemabawk BC – 8:30 pm