MSPMC-a tel zingah mahnia hna endika thil phut an awm

Mizoram sawrkarin hmasawnna hna thawh a hmuna endik a, hna tha a awm theihna tura viltu atana a din Mizoram State Project Monitoring Committee-a tel zingah mahnia hnathawh endik a, thil ngiat nei an awm tih sawi a ni.
Mizoram State Project Monitoring Committee (MSPMC) thuchhuak chuan, Committee member atan mimal thiamna leh tawnhriat nei tha takte neiin, chu’ng mite chu mimal leh political party leh NGO aiawh hminghmerhin sawrkarin a dah a. Kalphung mumal tak neiin, member-ten hmalakna tur an ruahman ho a. Project zirchian duh an neih pawh a hmuna en tur a neih chu team siamin an tlawh a. “isit programme’ siamin project khawihtu leh department enkawltute a hma atangin mumal takin ziakin a hriattir lawk thin tih a sawi.
He team ami bak hi NGO emaw pawl ho emaw mimal emaw ten an duh lai apiang lo va chuk tura kal chu MSPMC kalphung a ni loa, a ti ngai lo tih a sawi bawk.
Tunhnaiah Mizoram State Project Monitoring Committee-in a tirh ni si lo, MSPMC hming chhala project endika insawiin, contractor-te chenna ina kala vau pah deuhin, a enkawltu department-te hnena thil ngiat neia kal an awm tih hriat a ni tih thuchhuah hian sawiin, ‘MSPMC chuan hei hi a duh loin pawi a ti a. Hetianga MSPMC hming chhala dik lo taka lo che hi project enkawltu department leh contractor te pawhin lo dawngsawng lo turin MSPMC chuan a chah a, hetiang thil hi thleng tawh lo se a duh takzet a ni,’ a ti.