MSSC Golden Jubilee MBBA CUP 2025 Champion – Chanmari BC, Sabhash!

MSSC Golden Jubilee MBBA CUP 2025
Champion – Chanmari BC, Sabhash!
MSSC Golden Jubilee MBBA CUP 2025 champion chu Chanmari BC an ni a, final December ni 2 zana Hawla Indoor Stadium, Republic Vengthlanga khelhah Zarkawt BCA chu 74-76 in an hneh a, Zoram infiamna khawvela an hming Champmari tia koh theih hun a inherchhuak leh ta!
MBBA Season khuhhawnna Season Opening-ah Chanmari BC hian Zarkawt BCA hi semi finals-ah lo hneh tawhin, final-ah Khatla TBL point 2 leka hneh lovin an vanduai a; tun tum MBBA Cup-ah erawh thawnthu thar ziakin point hnihin Mizorama basketball club hlawhtling bera chhalngam, MSL tum 7 teh meuh mai champion tawh Zarkawt BCA chungah ‘sabhashhh’ tiin an sulhnu thar nen lam an thai e.
MBBA Cup-ah hian Chanmari BC hian match khata point tam ber an 1st match-ah neiin, 107-77 zetin Bawngkawn Horns lakah hnehna an chang a; Nursery BC, Vanguard leh Chhinga Veng BC lakah harsatna tawk lovin semi final an inhlang kai zui. An defense that zar liau liau chhawrin Zemabawk BC lakah point 5 a hnehna changin final an lut zui a, Champmari tih hlawhchhuah nan Zarkawt BCA final-ah an hneh.
Chanmari BC hian tun intihsiakna ah hian an palian, fit 6’5 zeta sang Bik Mike leh basketball court chhunga palian leh huhang ngah Rozama khelh that an hlawkpui takzet. Nuna hi defense leh offense-ah rintlak player a ni cheu a, player vanduai inhliam ngun Eddie-a pawhin a vanglai a la liam lo tih a phochhuak. Samson-a leh Ruata hi chhinchhiah tham an ni zui zual e – squad an neih chhah hi an coach hnuhma nei hrawl pahnih Lana leh Reuben-a tan a thlamuanthlak dawn tih a hriat a, team boruak tha erawh anni pahnih hian an vawn nun zel a ngai ang, player tha an kawl te enkawl turin an tawnhriat a tangkai zel bawk dawn.

Lawmman chhehvel (Mipa)

Tangkafai, certificate leh medal-te chu lawmman dawngte hnenah hian MSSC lamin sem tur a buatsaihte chu sem chhuah a ni.

1. Champions – Chanmari BC
2. Runners Up – Zarkawt BCA
3. 3rd Place – Zemabawk BC
Lawmman chhehvel (Hmeichhia):

1. Champions – Bungkawn LBA
2. Runners Up – Team Alpha
3. 3rd Place – Mission Veng Hotshots

Hoops Mania Time Out,
MBBA Calendar 2025 – 2026:

May thla khan MBBA hian tun season hi a khuhhawng a, player & club registration bakah referee recruitment leh clinic te May thla hian a nei nghal zat a, june thla atangin intihsiakna hrang hrang a buatsaih nghal chat.
Inkhel a buatsaih chhehvel te chu inhan phochhuak teh ang.

1. Season Opening Tournament (June)

Champion – Khatla TBL
Runners Up – Chanmari
Semi Finalist – Zarkawt BCA & Zemabawk BC

2. MBBA Inter Village Tournament (July)

Champion – Zarkawt LC Team
Runners Up – Tuikual South LC Team
Semi Finalist – Dawrpui Vengthar
& Nursery Veng LC Team

3. Inter School Tournament (August)

Champion (HSS) – Mt. Carmel
Champion (H/S) – Mt. Carmel
Champion (M/S) – Home Missions
Champion (Primary) – Graceland

4. Inter District Tournament (October)

Champion – Kicksology (Division 2)
Runners Up – Mission Vengthlang BC

Mizoram basketball inlumlet vel zir chet chet a, belchiang duh tan chuan MBBA hian tun season hi chuan thapui a thawh zual tak meuhin, December thla hian 3X3 tournament a la buatsaih cheu tur te hi hlawh nei lo va pawl inrelbawlnaa inhmang tawh thin chuan ‘MBBA lakah hian mark’ an pe sang ngawt ang.
Chutih rualin, MBBA lam hian pawp thawm that ngai erawh an nei ve reng tho a, Mizo thalaite hmakhawngai takin an pen chhuak ta sa sa a, tha thlah lovin a calendar buatsaih chinah hian tang sauh sauh se tih hi The Aizawl Post Hoops Mania chuan kan duhsakna a ni e.