MTKP khawmpui nena insu buaiin VC/LC inthlan nei lui – MPCC president

MTKP khawmpui nena insu buaiin VC/LC inthlan nei lui
– MPCC president
Thalai Kristian Pawl inkhawmpui neih tur hre lawk siin, insu buai pha tura Mizoram sawrkarin village council leh local council inthlan a buatsaih chu Mizoram chhim lam atanga minister leh MLA ten awka neih ve awma a ngaih thu Congress president Lal Thanzara chuan a sawi.
Thawhtannia Lunglei District Congress Committee (LDCC ) in VC leh LC inthlan campaign kharna inkhawm Lungleia an neih a hmanpuinaah MPCC president chuan, Mizoram Baptist Kohhran Thalai Pawl (MTKP) inkhawmpui lian February 13 atanga tan tur a awm tih hrereng chungin sawrkarin inthlanpui hun atan February 12 a ruat a, inkhawmpui leh inthlanpui ni a inang chuang lo pawh ti mah se, he inthlanpui hian TKP member leh hruaitu tam tak a nghawng buai ngei ang tih a hriatsa tih a sawi.
“Inkhawmpui kal chak ve tak tak mi tam tak chuan MTKP inkhawmpui hi inthlan lama an buai avangin an chhim ve thei dawn lo tih a chiang a. Hetiang hun khera inthlan buatsaih lo tur hian kan chhimlam minister leh MLA te hian awka an nei ve lo em ni,” a ti.
MNF leh Congress an sawrkar tawh thin a, an sawrkar laiin mipuiin an bawh luai luai thin laiin, tun sawrkarin kumkhat emaw chauh an tlin hnua an chhuahsan luai luai thung chu thil mak tak a ni tih Lal Thanzara hian a sawi. “Tun sawrkar hian mipuiah thil tha tam tak, thlai thar lei, hmunphiah lei leh thil dang a tiam a, a takin engmah a tih leh theih si loh avangin mi beidawng tam tak an siam mek,” a ti.
Congress party-in sawrkarna a chan leh hunah NLUP cheng nuai khat dawng tawh chhungkaw 140000 bakah SEDP cheng nuai 3 dawng leh ta si lo pawh huam vekin, mirethei khaichhuahna atan cheng nuai 2 an hmang dawn a, an sem dawn loa, miretheite an khaichhuak dawn tih MPCC president hian a sawi.