Muaythai medalist Ngaihawma hmuak ropui

Muaythai medalist Ngaihawma hmuak ropui
Nimin, Thawhtanni khan a tlukluhna Muaythai Association of Mizoram (MAM), a chenna veng Hunthar all NGO leh a luhna Pachhunga University College-te chuan India aiawha Senior World Muaythai Championship-a bronze medal awrhtu Lalngaihawma chu Lengpui airport-ah an theihtawpa ropui leh hlungin an lo hmuaka, Hunthar Venga MHIP Hall-ah Hunthar Veng all NGO buatsaihin a hmuahna leh lawmpuina hun hmanzui a ni.
May ni 13, 2023-a zawhfel tak khawvel huapa Muaythai inelna lian berah hian Mizo tlangval Lalngaih-awma chuan -48kg huangah beiseiawm taka khel chhoin, semi-final lama a khingpui Iraq player chu sawi zui hlawh ang reng tak, split decision hmangin a hneh lo a, bronze medal a dawng ta a ni.
Ngaihawma bakah he world championship-ah hian Mizote’n international referee kan neih pathum zinga pahnih- Liansangpuii Renthlei leh Lalhlimpuiate pawhin R&J hna an thawk a, nimin khan an pathumin Lengpui airport an lo thleng a, an chipuite’n an theih-tawpa nasain an chawimawi.
Chhun dar 12-a lawmna leh hmuahna inkhawm hi AMC Corporator John Zosangliana’n telpuiin, lawmpuina’n sumfai Rs. 5,000 a hlan a; Local Council leh NGO pawl hrang hrangte’n lawmpuina pangparthi leh thilpek hlan bawkin, MAM senior vice president V. Lalmuankima chuan Mizo pathumin Senior World Muaythai Championship an chhim theihna tura sum leh paia tanpuina petu sports minister MSSC president ni bawk Robert Romawia chungah lawmthu a sawi.
World championship-a kalte aiawha thusawitu international referee & judge chuan he cham-pionship-ah hian ram hrang hrang 102 an tel thu a sawi.
World bronze medalist Lal-ngaihawma pawhin thu sawiin, world championship a kal theihna tura theihtawp chhuahpuitute chungah lawmthu a sawi a; world championship khel thei tura hriselna leh hun tha petu Pathian bakah a nu leh pate chungah lawmthu sawi chungin nakkumah medal ropui zawk hawn ngei a tum thu a a tarlang tel.
Ngaihawma hi May ni 25, 2023-a Chennai-a nghah tur National Muaythai Championship lo awm turah Mizoram aiawh tura thlan mipali dangte nen an feh chhuak leh nghal dawn a ni.