Muaythai State Championship 2025
Ningani zan khan UEFAChampions League 2025-26 khelh chhunzawm a ni a, Etihad Stadium a inkhel hmuhnawm takah Manchester City in 2-0 in an mikhual Napoli an hneh, Napoli laka an chak tum hian Haaland chuan goal khat a thun a, Champions League record thar a siam. An mualah City an chak laiin Newcastle United erawh chu an mikhual FC Barcelona hneh lovin an tlawm ve thung.
Etihad Stadium-ah Manchester City leh Italian champion Napoli te inkhel tur hian ngaihven a hlawh hle. Ngaihven a hlawh leh zualna pakhat chu City midfielder ropui Kevin de Bruyne chu Napoli kawr haa inlan a, a club hlui City a hmachhawn dawn vang a ni. De Bruyne hian a ropuina thin mualah lawm hlawh viau mah se a club hlui lak an tlawm tur rawh a chhan him zo chuang lo thung. Eithad stadium-a inkhela hming chungnung ber chu Erling Haaland bawk a ni.
Italian champion Napoli hian mikhual an nihna hmun Etihad Stadium-ah bul an tan tha lo viau a, inkhel tan atanga minute 21-na lekah Giovanni Di Lorenzo hnawhchhuah a ni. Team lian lakah tlem zawk an ni hian an tuan a tifum viau a, an hlauhawm tur angin an hlauhawm theih loh phah. Tlem zawk ni bawk mah se an inveng thei viau thung a, chawlhlawk hmain goal an chhuah lo va, goal lut awm lovin chawlhlawk an hmang.
Chawlhlawk hmain goal thun thei lo mah se chawlhlawk hnu lamah City in goal an thun ta thuai thung. Minute 56-naah Erling Haaland chuan player of the match a thlan zui tak Phil Foden siamsak atangin hmahruaina goal a thun. Tam zawk an nih bakah goal thun hmasa an nih vangin City an phur viau a, an mikhualte an nawr nasa zui viau bawk. Haaland goal thun atanga minute 9 na chiahah khel tha tak Jérémy Doku chuan an goal hnihna thunin an hmahruaina a tizau. Doku goal thun hnu hian hun tawp thlengin goal dang a luh belh thei tawh lova, City in an mualah si hnih faia hnehna changin point thum an hmu.
Haaland UCL goal 50
Napoli laka goal hmahruai thuntu Erling Haaland chuan UEFA Champions League-ah goal 50 a thun tling ta chiah a, UCL-ah goal 50 thun tling rang ber record thar a siam.
UCL-ah goal 50 thun tling rang ber ni thin chu Ruud van Nistelrooy a ni a, United forward hlui hian khelh 62 atangin goal 50 a thun tling. He record hi a din reng hnuin Haaland a rawn lang a, Haaland hian khelh 49 atangin goal 50 a thun tling a, Van Nistelrooy record a khum chiang hle. UCL-ah goal 50 thun tling tura Haaland-an Nistelrooy aia game a mamawh tlem zawkna hi game 13 lai a tling.
Player ropui Lionel Messi chuan UCL-ah goal 50 thun tling turin game 66 a mamawh a. UCL a goal thun tam Cristiano Ronaldo phei chuan UCL-a goal 50 thun tling turin game 91 lai a mamawh ve thung. Hei hian Haaland-an goal a thun theihzia a tilang chiang viau a. Inhliam lova a khel tha chhunzawm a nih chuan Cristiano Ronaldo record khum thei tura ngaih a ni.
Goal thun lama record siam chho mawlh mawlh Haaland hian Red Bull Salzburg tan UCL-ah goal 8 a thun a, Borussia Dortmund tan goal 17 a thun tawh bakah a khelh mekna Manchester City tan goal 27 a thun tawh bawk. UCL-a goal 50 a thun zinga goal 8 hi penalty hi a thun a ni ve thung. Kum naupangte hi chungin Haaland hi Norway tana goal thun hnem ber a ni der tawh a. EPL-ah game 101 khelin goal 91 a thun tling hial tawh bawk a. Khawvelah league harsa bera ngaih EPL-ah meuh pawh khelh 100 atanga goal thun tam ber a ni hial bawk. Goal hmaah a hriam that em vangin ‘Haaland nge nge’ tih loh theih a ni lo.
Newcastle an tlawm
Ningani zana inkhel dangah Newcastle United chu St James Park-a an mikhual FC Barcelona hneh lovin an tlawm. Newcastle laka Barcelona goal pahnihte hi Manchester United a hmun chang phak tawh lo Marcus Rashford thun ve ve a ni a. Reuben Amorim hnuaia hnawng kha club ropui Barcelona chakpui leh an hlimna thlentu a ni.
St James Park-ah Newcastle United leh an mikhual Barcelona te an inhnehtawk viau a, goal thun tumin innawr tawn viau mah se chawlhlawk hmain goal thun thei an awm lo. Chawlhlawk hmain goal lut awm thei lo mah se chawlhlawk hnu lamah goal thum ngawt a lut a, inkhel a hmuhnawm leh zual.
Mikhual team Barca tan hian loan-a an hawh mek Marcus Rashford chuan minute 58-naah hmahruaina goal a thun. Hmahruaina goal a thun hnuin Rashford hian minute 67-naah an goal hnihna a thun zui leh a, an hmahruaina a tizau. Goal hniha an hnufual hnuin Magpies in an si phurh sut ngei tumin tan an khawh a, hun tawp dawn hnaih minute 90-naah Anthony Gordon chuan goal thunin an si phurh a sut a, tlawm beiseina thar an nei. Goal thun belh tumin tan khawh nasa zui viau mah se an hlawhtling zo tawh lova, an mualah ngei Barcelona ngam lovin an tlawm a. UCL-ah beisei angin bul an tan tan tha thei lo.