MUCHS-a damdawi in lian ziahluh loh hi insen tam hlauh vang em ni? – Robert Romawia

On Feb 20, 2026 0 0

MUCHS-a damdawi in lian ziahluh
loh hi insen tam hlauh vang em ni?
– Robert Romawia
Sawrkarin Mizoram Universal Health Care Scheme (MUCHS) a private damdawi in lian a inrem pui theih loh chhan hi sum sen tam hlauh vang a ni em, tiin MLA Robert Romawia Royte chuan a zawt.
Ningania Assembly Session-ah Hachhek bialtu MLA Robert Romawia Royte hian, mipuiin MUCHS-ah an inziaklut a, thingtlang lamah phei chuan khawsak harsa tak tak an ni a, dam loh nikhuaa an belh duh ber Civil Hospital chu pantu an tam avangin MUCHS hman theih lohna private damdawi inah refer an ni leh fo thin tih a sawi.
Heng damdawi in lian hoin an zawm theih dan dapin, mipui hmakhua ngaiin a tul chuan sawrkar chu inphahhniam mai turin a ngen tih a sawi a. Damdawi in lian an inrempui loh chhan hi sawrkarin MUCHS ah sum sen tam a hlauh vang a ni em, tiin a zawt a ni.
Health minister Lalrinpuii chuan tuna MUCHS zawm lo damdawi in hi inrempui dan an dap reng a, tunhnaiah pawh an rate thehlut turin an sawm a. An rate hi an rawn thehlut a, a san em avangin sawrkarin a ti hleithei lo a ni ber tih a sawi a. Mizoram damdawi in lianah emergency leh nunna atana hlauhthawn awm angah chuan an luh theihna dah tel a ni tho a, hemi atang hian tam tak an claim ve reng tho tih a sawi a ni.
Package rate anga an rate duh angin damdawi inte hian an rawn siam mek a, sawiho leh a ni dawn tih a sawi. Package system lo chuan National Health Mission leh ADB lamin an remti meuh tawh lo tih a sawi.