Mumbai-ah Mizo Lakhuihthei Fest

Ni hnih awh tur Mizoram Pineaple Festival chu Inrinni tlai atang khan Mumbai-a Jio World Drive ah neih tan a ni.
Festival hi Mizoram Horticulture department kaltlangin Josie’s Kitchen buatsaih a ni a. A hawngtu Horticulture addl. director L Lalhmingmawia Pachuau chuan Mizoram tharchhuah lakhuihthei India ram khawpui lian zawka hralhchhuah a nih theihna turin a thehlar tumna hmanrua atan Pineapple Festival hi buatsaih a ni tih a sawi a. Festival atan hian Sialhawk leh a chhehvel khua atangin lakhuihthei quintal 10 chuang thawn thlak a ni tih a sawi.
Pineapple Festival-ah hian lakhuihthei bakah organic stall, handloom & handicraft leh Mizoram start-ups, MOM, Tuichangral Farmer Producer Organisation leh stall dang hawn tel a ni.
Festival chhung hian lakhuihthei thar hi zawrh chhuah reng a ni a. A tlawhtu mipui tan lakhuihthei ei tur, juice leh cocktail siam chu zawrh nghal a ni. Mizorama tharchhuah tui leh that bik zia hi Bollywood-a vawrhlar tum a ni bawk.
Horticulture department hian stall neiin, lakhuihthei bakah Dragonfruit, Mizo hmarcha, Sapthei, Anthurium, grape wine, sawhthing leh aieng an phochhuak a. Reliance Freshpik hotu liante pawhin an chhim a. Hetiang dawr hi India ram khawpui hrang hranga zawrh tura indawr zui zel tum a ni.