Mumbai beihnaa bultumtuin India a thleng ta

Mumbai beihnaa bultumtuin India a thleng ta
Pakistan-a piang, Chicago sumdawng, kum 2008-a Mumbai khawpui beihnaa inhnamhnawiha a puh avanga India-in a man duh chu US-in an ram atanga a thawn chhuah hnuah Delhi tumpui a ni ta.
Canadian khua leh tui, Tahawwur Rana-a hi Ningani tlai khan Delhi-ah phurh thlen a ni a. India-a National Investigation Agency (NIA) chuan lak chhuah hi hlawhtling taka kalpui a ni tih a sawi.
Kum 2011 khan US court chuan mi 166 thihnaah khan a tel ngei tih a lo sawi tawh a; mahse, he beihna thlentu pawlte a pui nia puhnaah erawh thiam loh a chantir lo.
Kum 2013 khan kum 14 tang tura tih a ni a, kum 64 mi hi a hriselna dinhmun avangin kum 2020 khan chhuah a ni a; mahse hemi kum vek hian India-in an rama thawn luh a dil hnuah man leh a ni.
US court chuan kum 2023 khan Rana-a thawn chhuah hi a phal tawh a; mahse, an ram sorkarin phalna a pek mai loh avangin lung inah a tang zui ta reng a ni.
February khan President Donald Trump-a chuan Prime Minister Narendra Modi-a nen an inbiak hnuah thawn chhuah hi a phal ta a ni.
US Supreme Court hnenah Rana-a hian sorkar thutlukna hi khing leh mah se hnawl a ni.
Thawn chhuah hi kum 1997-a ram pahnihten India-US Extradition Treaty an ziah behchhana kalpui a ni.
Rana-a hi Pakistan-a sei lian niin damdawi a zir a, Pakistani army-a medical corps a zawm a. A nupui pawh doctor niin kum 2001 khan Canadian khua leh tui an ni tan.
Chicago-ah pemin Rana-a hian sumdawnna chi hrang hrang a kalpui a, immigration & travel agency pawh a tel.
Indian thuneitute chuan Rana-a hian a naupan laia a thian, David Coleman Headley-a nen Mumbai beitu, Pakistani hel pawl, Lashkar-e-Taiba (LeT) an pui niin a puh a ni.
Hel 10-te chuan Mumbai-a rel station, khualbuk, cafe leh Jewish centre an bei a, silai nasa taka an hmeh puah bakah bomb an ti puak a. LeT hi India leh US ramten firfiak pawla an chhal a ni.
US-a judge-te chuan kum 2006 khan Rana-a remruatnain Headley-a hian Chicago-a a immigration services firm chuan Mumbai-ah pisa a hawng a, hemi pah hian Headley-a hian kum 2008-a an hmun beihte kha a thlithlai niin an puh.
Rana-a hian Headley-a hi a firm aiawhtua dahin hemi hmang hian chanchinbua fakna chhuah tur dawr kualin chanchinbu pisa hrang hrang a luh theih phah bawk.
Headley-a hian a hnuah Mumbai-a beih tur hmunte hi a thlithlai ngei thu a sawi a. LeT leh Pakistani intelligence service ISI nen pawh inzawmna an neih thu a sawi a. Pakistan erawh chuan hei hi nasa takin a pha thung a. Headley-a hian Rana-a nen pawh an inpawh hle tih a sawi bawk.
Rana-a aiawha court-a dingte chuan Headley-a hian dawt sawiin buainaah a pawt lut niin an sawi a, Pakistani military school-a an kalho thin laia an inthianna chu dik lo takin a hmang niin an sawi.
Kum 2011 khan Chicago court chuan Rana-a hi LeT a pui tiin thu a titlu a, Danish chanchinbu, Jyllands Posten beih tuma puhnaah erawh thiam an chantir a. Mumbai khawpui beihnaah hian an puhna lian tak takah thiam loh chantirin kum 14 tang turin a hrem ta a ni.
Headley-a hi he beihna avang hian kum 35 tang tura tih a ni thung a, Chicago-ah a tang mek.
India-ah pawh Rana leh Headley hi anmahni man lo mah se an chungthu ngaihtuah a ni a, a hnuah Headley-a hian a tel ngei thu pawh a sawi.
NIA-in Rana an puhna zingah hian pawi khawihna duangtu, India sorkar beitu leh firfiaka chea puhna a tel.
US-ah hian court hniam zawkah thawn chhuah loh a dil tawh a, US court-a thiam a chan tawhna tam takah India-ah chuan hrem a ni thei dawn niin a insawi.
A dilna hi hnawl niin India-in a puhna chu US-a a chungthu ngaihtuahna nen chuan a hrang niin court chuan a sawi bawk.
US Supreme Court-ah thawn chhuah loh hi a dil leh a, US dan leh United Nations Convention Against Torture palzutna a ni thei niin a thlen a. “Thil dinhmun thlirin thawn chhuah a nih chuan a diltu hi rawng taka tih a tawrh a rinawm hle a ni,” tiin a thlen a ni.
“Mumbai khawpui beihnaah tela an puh, a diltu hi Pakistani Muslim a nih bawk avangin atan a hlauhawm,” tiin a dilnaah a ziak bawk.
Rana-a hian a hriselna dinhmun avang leh Indian lung inah enkawlna tha a dawn loh a hlauhawm bawk nia sawiin thawn chhuak lo turin a ngen a, hnawl a ni.